Sport | 15. sep. 2016

Tre frå Os i nytt kretsuttak

Hordaland sitt G14-lag skal møta gutelaga til fleire lag frå Tippeligaen. Tre på kretslaget er frå Os.

Tre frå Os i nytt kretsuttak
Oscar Lekven Fimreite (t.v.) og Elias Heggland Myrlid er klare for kretssamling. Ikkje på bildet; Knut Jordal (Fyllingsdalen/Lysefjorden). (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøytorsdag 15. sep. 2016 07:25

I inngangen til haustferien, helga 8. og 9. oktober, blir det gutar 14-turnering på Nymark ved Brann Stadion.

Der skal Hordaland sitt kretslag møta gutelag frå fleire lag frå Tippeligaen, blant anna SK Brann sine gutar.

Uttaket er nettopp klart og av 21 spelarar er det 3 frå Os:

Knut Jordal frå Fyllingsdalen (bur i Lysefjorden) og Oscar Lekven Fimreite og Elias Heggland Myrlid frå Os Fotball.

Elias debuterer

Samlinga i Bergen i oktober inneheld trening fredag og to kampar per dag laurdag og søndag.

Knut og Oscar har følgt kretslaget sidan første uttak i november i fjor, gjennom trening i vinter og på samlingar i Sogndal og på Bømlo i vår.

– Eg synest det har vore veldig bra til no og ser fram til denne helga, seier Oscar.

Elias er med for første gong.

– Det var kjekt å koma med i uttaket og eg gler meg til å vera med på samling, seier nykomaren på kretsen.

Han veit ikkje om representantar frå kretslaget har sett han i aksjon, og reknar med at uttaket er basert på innspel frå trenaren.

– Det blir uansett spennande, eg håper eg klarer meg godt.

– I fin utvikling

Os-trenar Ivar Johannessen seier fotballkretsen har blitt flink til å følgja fleire spelarar.

– Det skjer mykje med ungdomen i den alderen og mykje kan endra seg i løpet av eit år. Eg har forstått det sånn at det er ein del spelarar dei har sett tidlegare som no kjem inn, og nokre heilt nye.

Johannessen er ikkje overraska over at Oscar er med vidare, i tillegg er han glad for at det blei plass til Elias.

– Oscar les spelet godt, er flink til å bryta motstandaren høgt i banen og har nokre ferdigheter som eg veit kretsen synest er spennande. Elias er ein leiartype og har hatt veldig fin utvikling gjennom sesongen. Eg ønskjer gutane lykke til!

fotball.no kan du sjå heile uttaket.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.