«Treningsleir» med landslagsspelar

Bildeserie:

1 av 12

Like sikkert som at skulen slutter, er det at fleire av fotballklubbane i bygda inviterer til fotballskule dei første dagane i ferien.

Onsdag avslutta Os Fotball sin «Hassan El Fakiris fotballskole» med "landskampar" kor Spania, Noreg, Island, England, Marocco og fleire land møttest til turnering på kunstgrasbanene på Kuventræ.

– Vi har vore vel 105 deltakar desse tre dagane. Det har vore knallbra, med god innsats og stor iver, fortel El Fakiri.

Klare for Sogndal

Fleire av spelarane speler på eitt av dei aldersbestemte laga som skal til Sogndal og Lærum cup denne helga.

– Ja, no har dei lagt på treningsleir, så no skal dei vera på topp før Sogndalturen. Os-laga blir tøffe å møta der oppe i år, smiler ostrenaren.

Fekk landslagsspelar på vitjing

Som på Søre Neset fekk også deltakarane på Os vitjing av Brannspelarar onsdag. Costa Ricanaren Deyver Vega, som står med 13 A-lagskampar og fleire U17- og U20-VM kampar for Costa Rica tok med seg Benjamin Gleditch, som er på prøvespel i Brann, for å helsa på dei unge fotballspelarane.

– Eigentleg skulle Kristoffer Bramen vore med Vega hit, men han er sjuk, så då sa Benjamin at han gjerne blei med. Det var mykje betre med ein tur til Os enn berre å ligga på hotellet, fortel keepertrenar Dan Riisnes som var sjåfør for dei to spelarane.

Sjå òg bildeserier frå fotballskulene på Søre Neset og Nore Neset.