Turbokveld i Oselvar

Bildeserie:

1 av 12

Tysdag kveld yra det av små, og litt større, ungar i og rundt Oselvarnausten. Bakgrunnen var at Geir Jonassen og Oselvarlaget hadde invitert Turboklubben til turlaget på båttur.

– Vi har tenkt at de skal få ro ein litt lengre tur seinare, men i dag skal de få testa Oselvaren, som er heile Noreg sin nasjonalbåt, litt oppover Oselvo. Det er fint om de vaksne startar med å ro, så slepp de ungane som har lyst til å prøva etterkvart, innleia Geir Jonassen då han ønskja velkomen.

Hissig hamnesjef

André Marton Pedersen fortel om ei stor oppleving for dei turglade ungane.

– Både små og store storkoste seg. Dette blei ein super kveldsstund, kor mange av ungane fekk prøve å ro for første gong.

– Vi blei òg angrepen av sjølvaste Hamnesjefen, som vokta egga lengre opp i elva, men det gjekk heilt fint, fortel han.

Cold Cat og hot dog

Tilbake på land, i Oselvarnaustet, serverte Jonassen Cold Cat og hot dog.

– I tillegg til at dette var ein fin måte for ungane å bli kjend med oselvaren og den stolte tradisjonen vi ber med oss i bygda, så fekk dei utfalda seg kreativt med å spikra eigne trebåter tilbake på land.

– Vi set utruleg pris på at Geir og Oselvarlaget inviterte oss med på dette, avsluttar Marton Pedersen, som legg til at over sommaren er Turboklubben open for alle born som vil vera med. Turane er ikkje berre i Lysefjorden, kor klubben har sitt utspring, men i heile Os.