Utrykning til matlaging

Fredag klokka 22.13 gjekk alarmen hos Os Brannvesen.

– Vi blei varsla av Nokas, som meldte om ein utløyst alarm i Stølsvegen, fortel Terje Håvardstun frå Os brannvesen.

Vel framme på adressa viste det seg at røyk frå matlaging var årsaka til alarmen. Det var ikkje noko for brannvesenet å sløkka.

– Når alarmselskapa blir varsla så ringer dei huseigar. Dersom dei ikkje får tak i huseigar, eller huseigar stadfestar at det er brann, varslar alarmselskapet 110-sentralen og vi rykker ut, forklarar Håvardstun.

I kveld var ikkje huseigar å få tak i og dei som var heime og lagde mat kjente ikkje til rutinane, så dei fekk ikkje avkrefta at det var brann.