Utsett arbeid på Ulven grunna ras på Fanafjellet

Frå klokka 20 måndag kveld til klokka 6 tysdag morgon, og tilsvarande klokkeslett frå tysdak kveld til onsdag morgon, skulle Forsvarsbygg ha stengt fv 160 Ulvenvegen og fv 161 Lyseklostervegen.

Årsaka er at dei vil fjerna ein jordhaug som kan innehalda ammunisjonsrestar.

Men i går blei Fanafjellet stengt grunna ras, og blir stengt ut neste veke, noko som har ført til at vegvesenet har trekt løyvet sitt for stenging ved Ulven leir.

– Arbeidet skal gjennomførast, men er utsett på ubestemt tid.

– No må vi finna ei ny tid som passar både vegvesenet, entreprenøren og Ulven leir, seier senioringeniør Svein Solli i Forsvarsbygg til Midtsiden.

Flaskehals med propp i

Torsdag kveld fekk Midtsiden melding frå ein lysefjording som uroa seg for infrastrukturen mellom krinsen sin og omverda.

– Det var ei utforkjøring i Langedalen torsdag, og denne førte til at vegen blei stengt. Kva om dette hadde skjedd på måndag eller tysdag? spør vedkomande.

Solli hos Forsvarsbygg fortel at utrykningskjøretøy i utgangspunktet skal kunna passera uhindra når det blir graving og stenging på Ulven. Også buss i rute skal få passera.

Men dette blir uansett ikkje aktuelt så lenge Fanafjellet er stengt. Flaskehalsen Langedalen er med andre ord ikkje einaste opne veg mellom Lysefjorden og Os eller Bergen.