Utvida Bar(t) og nytt venterom

Bildeserie:

1 av 4

Eigedomane Servicebygget, Kaien og Peppes var eigd av eit dotterselskap i Midgard Gruppen AS, men Peppes- og Bar(t)-eigar Fredrik Wagner-Larsen har kjøpt eigedomane tilbake.

Frå selskapet hans, Wala Gruppen AS, i mars overtok eigedomane, har Fredrik planlagt ei flytting av venterommet han leiger ut til Os kommune for passasjerar som reiser med hurtigbåt frå kaien utanfor.

– Vi hadde eit møterom som var i bruk av og til, men som ikkje var naturleg å slå saman med resten av restauranten ved behov. Og så hadde vi venterommet, som eignar seg godt både som lokale for møte og eige selskap, og som ei utviding av Bar(t) og resten av restauranten, forklarer Wagner-Larsen.

Ferdig i går

Den siste veka har arbeidet gått for fullt for å få begge lokala klare til bruk.

– No er venterommet, med ny ytterdør og ny rampe for barnevogn og rullestolbrukarar, klart til bruk. Her er passasjerane nærmare båten og dei får tilgang på internett. Det kjem også heilt nye møblar til venterommet, og passasjerane får tilgang til Peppes sine toalett.

– Det førre venterommet var fint frå før, men er nydekorert og nyinnreia i stil med Bar(t).

– Vi innstallerer også projektor her og lokalet eignar seg fint til møter og grupper både på dagtid og kveldstid, samtidig som ny skyvedør sørgjer for at den blir ei naturleg utviding av Bar(t).

God drift – med motgang

Fredrik fortel om stabil, god drift på Peppes Pizza Os og den nyare loungebaren Bar(t).

Selskapet han starta saman med broren, med tomme nevar, har vakse til eit eigedomsselskap og to restaurantar. Fredrik eig som kjent også selskapet som har Peppes Pizza på Voss.

– Men det krev ein del innsats, med 40 tilsette og ein del eigedom å passa på.

– I fjor gjekk vi bokstavleg talt på ein smell. Lynnedslaget under Osfest-helga (sjå video av nedslaget) kosta oss 700.000 kroner. Alt elektronisk utstyr blei øydelagt, mykje av det var nedskrive i verdi og gav låg utteljing hos forsikringsselskapet. I tillegg tapte vi mykje omsetnad.

To månadar seinare fekk han skadar på Peppes på Voss for to millionar grunna flaum, men dette blei dekka.

– Eg vil likevel halda fram med å reinvestera noko for å gjera eigedomane betre både for drifta og for gjestane. Vi håper også at den nye løysing med flytting av venterommet og utvida Bar(t) skal fungera betre for dei fleste, seier Fredrik Wagner-Larsen.