Vassleidningsbrot ved Gymnasvegen

Tysdag litt før klokka 9 kom dei første meldingane til teknisk eining i Os kommune.

– Det ser ut som om vi har eit brot på ein vassleidning, seier teknisk vakt Jan Terje Lund.

– Vi har ikkje funne brotet, men driv no søk mellom Gymnasvegen og Rema Kuven stasjon.

I perioden med søk blir krinsar kopla ut og inn. Innbyggarar i området kan oppleva redusert vasstrykk, og å mista vatnet heilt. Når brotet er lokalisert og reparasjon startar vil enkelte vera utan vatn i ein lengre periode.

Fleire brot - fleire utbetringar

Det er ikkje lenge sidan førre vasslekkasje, søndag for ei god veke sidan var det to vassleidningsbrot i krysset Hamnevegen-Hatvikvegen.

Lengre nord langs Byvegen, mellom Meny og Amfisenteret, har gangvegen vore stengt sidan 10. januar grunna legging av nytt vatn og avlaup. Arbeidet held fram til mai.