Velfortent trøstemål

Bildeserie:

1 av 14

Os - Åsane 1-6 (0-5)
Målskårar, Os: Øystein Takle Eide (1-5 i 81.)
Målskårarar, Åsane: Joakim Vatle Hammersland (7., 17. og 40. på bursdagen sin), Håkon Holmefjord Lorentzen (22.), Aleksander Solli (36.) og Daniel Steensæth Tørum (88.)
Os: Frode Moberg Øvredal - Endre Brenne (Vegard S. Skeie), Divaldo Cardoso, Alexander Dale, Torkel Hjertnes - Øystein Takle Eide, Martin Røttingen Eidsvik, Marius Mikkelsen (Christoffer Hafsås), Frode Storebø (Alexander Mjånes Tøssebro) - Rafael Villén og Mats Cato Moldskred.
Gule kort, Os: Brenne og Dale
Dagens Os-spelar: Mats Cato Moldskred

• Sjå video frå kampen (8 minutt)

Os (4. divisjon) fekk det tøft i første NM-runde. Kampen gjekk mot Åsane (OBOS-ligaen), som tok leiinga i 7. minutt og auka til 0-3 i 22. minutt.

– Vi klarte å stå med høgt press, var aggressive i spelet og var flinke til å bruka dei romma vi fekk, seier ein nøgd Åsane-trenar Mons Ivar Mjelde.

Os var ikkje sjanselause før pause, Moldskred skaut i stanga og var centimeter frå å heada eit innlegg i mål, og Øystein Takle Eide var åleine med keeper. Eitt av Åsane-måla kom på frispark, eit anna etter ei noko uheldig klarering.

I andre omgang var kampen prega av at Åsane ikkje trengte så mykje meir. Os gav ikkje opp, skapte meir, men klarte først i 81. minutt å få ballen i mål.

– Andre omgang er eg ikkje nøgd med, samtidig løfta Os seg ein del og gjorde ein ganske god omgang, synest Mjelde.

Ein ting å gleda seg over

– Vi blir nådelaust straffa for feila vi gjer, feil Åsane kunne gjera, men sleppa unna med det, seier Os-trenar Tim Henrik Sperrevik.

Han hadde lagt om til fire forsvarsspelarar, men divisjonsforskjellane klarte ikkje Os å skjula.

– Dette blei øving for vår del, men det eg gler meg mest over etter kamp er måten gutane klarer å omstilla seg på. Vi får så øyrene flagrar før pause, så går dei ut og jobbar på denne måten.

– Det viser at det bur karakter i dette laget, og det kan vi få bruk for i serien òg, seier Sperrevik.

– Greit at det ikkje blei spennande

Osingen Simen Helland Lassen spelte frå start for Åsane og fram til pause. Sambygding Ole Martin Lekven Kolskogen spelte frå start til han i 64. minutt gjekk ut med krampe.

– Det var kjekt å spela her igjen og heilt greit at det ikkje blei så spennande, synest Ole Martin.

– Det var òg kjekt å sjå kor god Vegard (Strønen Skeie) har blitt, han hadde ein god omgang, synest Kolskogen om den tidlegare lagkameraten både på A-laget og i aldersbestemt.

• Sjå video frå kampen (8 minutt)