Vil driva framleige av restaurantlokalet

iSushi Os, som opna som kjeden sitt nye flaggskip onsdag 6. april 2016, gjekk ikkje så bra som eigar hadde håpa på.

• Bildeserie: Sånn var opningsdagen

I september gjekk eigar ut og fortalte om planlagt stenging av restauranten, 1. november, etter knappe 19 månadar i drift, pakka dei saman og stengte av.

– Kanskje blei det for stort, kanskje dreiv vi ikkje godt nok. Eller ein kombinasjon av begge, seier gründer og kjedeeigar Roger Johannessen.

Andre stadar gjer han suksess med iSushi, i hovudsak med takeaway eller mindre restaurantar, men på Os gjekk det ikkje bra.

Vil leiga ut

Johannessen brukte over 3,5 millionar kroner på etableringa på Os.

– Vi kjem ikkje til Os for å skumma pengar, vi etablerer oss for å tilføra noko. Om eg berre tenkte business kunne eg klart meg med 100 kvadratmeter, her har vi 300, sa han etter å i 2015 ha teikna leigekontrakt.

Leigekontrakten er på fem år.

– Vi ønskjer naturlegvis at lokalet skal brukast, og eg har fleire interessentar, både lokale og folk utanfrå Os, små og større firma.

– Alt bør ligga til rette for at ny leigetakar kan driva godt, med nytt kjøkken, ny innreiing, ny uteservering og god plassering ved hamna.

Har ikkje hastverk

iSushi-gründaren reknar ikkje med å få alle dei tapte kronene tilbake, men seier det vil hjelpa om det kom inn ein leigetakar.

– Vi har likevel ikkje hastverk. Drifta gjekk med tap, så nett no ser tala mindre dårlegare ut per månad enn før.

– Derfor tar eg meg òg tid til å venta på eit tilbod som er godt nok, seier Johannessen.