Viste seg fram på juleshow

Bildeserie:

1 av 11

Søndag var det tid for Os Turn sitt årlege juleshow, der både dei yngste turnarane, trampetten, cheerleadarane og turndamene får vist litt av kva dei har lært det siste året.

Som tidlegare år blei tribunen smikkfull, og publikum fekk sjå ein fin innmarsj av alle deltakarane før showet, som i fjor, starta med hopp og sprett og mykje akrobatikk.

Frå trippel til nesten-tabbe

– Eg har ikkje trent noko særleg i det siste, men eg fann ut at det var kjekkare å vera med på showet enn å berre sitja å sjå på, seier Tom André Hjelle, som i fjor tok ein historisk trippelsalto under showet.

I dag var han nær på eit lite uhell då han tråkka feil på trampolina og så vidt kom seg rundt på ein molberger (framlengs hopp med baklengs flip).

Sjå òg: Video og bildeserie frå showet i 2014

Unge og gamle sprekingar

Etter trampetter var det turn, frå dei yngste til dei eldste, der dei unge viste både balanse, koordinasjon, fine rullar og hjul.

Turndamene viste eit muntert og godt innøvd parti som dei tidlegare i år har stilt på stemne med på Hylkje.

Første cheerleading-konkurranse

Os TF Cheerleading består av tre grupper, med rundt 20 på mini, 30 på pee wee og 20 på junior og senior.

– Vi skulle hatt fleire gutar, nokre med litt tak i, som kan løfta og kasta dei flinke jentene våre. Cheerleading er ein populær idrett for gutar mange stadar. Vi har nokre få og låner litt hos trampetten, fortel Lena Stigen Mathisen, ein av instruktørane.

Etter showet med dei tre gruppene fekk publikum sjå eit innøvd program som dei fire jentene Tiril Skønberg Haaland, June Heggland, Elisa Parnefält og Helene Nytræ skal framføra i Haukelandshallen neste helg.

– Det er forbundet som har sett opp eit juleshow, ein konkurranse som er jentene våre sin første. Vi har vore på fleire show før, men dette er deira første konkurranse og ein sjanse til å kvalifisera seg til NM.

I videoen over ser du fem minutt av dagens juleshow, med dei fire konkurranseklare jentene i avsluttinga.