Torbjørg Brattabø og Jon Sivert Rykkel gler seg til å presentera hinderløypa under nattbadinga i kveld (foto: Andris Hamre)

Wibit i badet

Nattbadinga i Osbadet har blitt ein suksess, med 80-90 gjestar kvar gong. I kveld får ungdomane testa eit nytt leiketøy.

Av: Andris Hamre

Osbadet fekk 20 000 kroner i KUP-midlar tysdag, til innkjøp av utstyr til mellom anna nattbading for ungdom. I kveld får ungdommane som kjem sjå resultatet av investeringa.

– Vi har kjøpt ein wibit, ei hinderløype som dei badande skal få testa seg i. Desse er særs populære i Syden, så vi fann ut at vi hadde lyst til å gje det same tilbodet her heime.

• Sjå video og bildeserie frå nattbading i desember

– Vi følte vi hadde lyst til å gje dei litt eldre borna og ungdommane eit nytt tilbod. Håpet er jo at den skal vera med på å skapa endå meir aktivitet i badet, fortel konstituert dagleg leiar Torbjørg Brattabø og prosjektleiar for nattbadinga Jon Sivert Rykkel.

Osmeisterskap i hinderløype?

Rykkel, som var med å montere og testa banen torsdag kveld, fortel at det var ikkje så lett å koma over hindra som han hadde trudd.

– I alle fall om du skal prøva å gjera det fort. Eg lurer på om vi må laga ein konkurranse etterkvart. Kanskje vi kan få kjente osingar til å utfordra kvarandre, smiler Rykkel.

Kan brukast andre plasser

Hinderløypa får premiera si i kveld under nattbadinga.

– Det er primært mot den vi har kjøpt den inn, men vi kjem til å bruka den også i feriar og andre samanhengar. Kanskje kan den dukka opp i Vikjo til sommaren, moglegheiten er der, seier Brattabø.

Har blitt ein møteplass

I kveld er fjerde månaden på rad at Osbadet arrangerer nattbading.

– Det har blitt veldig populært. Vi har lagt på 80-90 born og unge i 10-15 årsalderen kvar gong.

– Det har faktisk vore ein stigande trend, noko vi tykkjer er veldig kjekt. Vi opplever at det har blitt ein møteplass for ungdom, avsluttar Rykkel.

• Videoreportasje: Bli med babyane under vatn!