145.000 i skulesekken

Kultur- og ressursutvalet i Fylkeskommunen delte på sist møte ut 10 millionar kroner til den kulturelle skulesekken. Os kommune får 145 217 kroner.

- Det er omlag det same som vi har fått tidlegare år, fortel Øyvind Gjerde på kulturkontoret i kommunen.

Den kulturelle skulesekken omfattar tilbod til alle elevane i 1. til 9. klasse ved skulane i Os.

- Vi har óg forsøkt å få til eit filmprosjekt for 10. klasse, men har ikkje lukkast å kome i mål med dette.

Den kulturelle skulesekken:

Den kulturelle skulesekken i Os kommune omfattar alt frå eventyrstunder til skulpturmaking og dans.

1. klasse:
Eventyrforteljing med Merete Gauden på Os folkebibliotek og presentasjon av biblioteket sitt tilbod til born og unge.

2. klasse:
Vitjing hjå Norvald Kobbeltveit på Hauge. Musikk og Os i gamledager, gårdsdrift, lokalhistorie og smak av tradisjonell mat.

3. klasse:
Vitjing på Villmarksmuseet til Helge Haukeland. Multimediashow og utstoppa dyr.

4. klasse:
Elevane lagar eigne skulpturar saman med Odd Olav Nøss. Avsluttast med felles utstilling.

I fjerde klasse er det i tillegg eit opplegg i Vargavågen som er ein del av eit fellesprosjekt i Midthordaland med ein fornminnedag.

- Her er det to arkeologar som mellomanna lagar mat med elevane i klebersteingryter og forklarar om hellerisningane i Vargavågen, fortel Gjerde.

5. klasse:
Dansaren Simon Woodhouse lærar bort break- og streetdance. Dei er óg innom andre stilartar.

6. klasse:
Lokalhistorie og ostradisjonar i form av musikk, sangleikar og bilete i regi av Os kulturskule.

7. klasse:
Forfattarvitjing. Bjørn Sortland har vitja skulane i Os tidlegare og kjem no attende.

8. klasse:
Vitjing på Hordamuseet. Inngong på museet er gratis, men midla frå den kulturelle skulesekken dekkar transporten. Er ein del av eit kystkulturopplegg.

9. klasse:
Oselvardagen. Er óg ein del av kystkulturopplegget kor elevane får prøva å ro og segla Oselvar, læra om knutar og får omvisning på Oselvarverkstaden.

Dei får óg eit forfattarbesøk. Dei siste åra har Thor Soltvedt frå Bergen vore på vitjing, kven som kjem i år er ikkje bestemt.