Ramo Racic, her i opprykkskampen i fjor, er ein av tre som skåra tre mål eller meir i førre runde. (Foto: Kjetil Vasby Bruarøy)

15-2-siger til Søfteland!

– Vi har styrka stallen og vi trengte å pynta på målforskjellen, seier tremålsskårar Ramo Racic.

Av: Kjetil Vasby Bruarøy

Det har vore ei god fotballhelg for seniorlaga i Os.

Lysekloster hadde fri, alle dei andre vann kampane sine.

Nore Neset 2 og Os 3 vann 5-0 og 6-1 i 7. divisjon, damelaget til Os vann 2-0 i 4. divisjon.

Os 2 slo Solid 4-1 i 4. divisjon søndag ettermiddag.

I 5. divisjon, der Nore Neset og Søfteland er nye i år, blei det òg tre poeng til begge laga frå Osbygda.

Nore Neset vann 3-2 mens Søfteland varta opp med skikkeleg målkalas!

– Eg trur dei stilte med eit ganske bra lag

Søfteland leia 8-1 til pause og vann 15-2 over Valestrand Hjellvik 2 på heimebane laurdag.

Gjestane skåra sitt andre mål på overtid.

Målskårarar: Preben Skorpen 4, Dani A. Bergstø 3, Ramo Racic 3, Preben Borgen 2, John Ole Johannessen, Stefan Bernsen og Joakim Hovden.
Sjå detaljar i kamprapporten (fotball.no)

– Eg trur dei stilte med eit greit lag, og at dei hadde med seg nokre spelarar frå førstelaget. Men vi fekk ein god start og dei fekk etterkvart ein mann utvist, fortel Søfteland-spelar og tremålsskårar Ramo Racic.

Søfteland leia 5-0 då gjestane blei éin mann mindre.

– Vi trengte å pynta litt på målforskjellen. Den siste tida har vi vore litt nede, folk har vore ute med skade og det har blitt nokre dårlege resultat.

– Derfor forkuserte vi på å halda konsentrasjonen oppe. Vanlegvis klarer du ikkje køyra på vidare når du leiar med fire, fem mål, men vi sto på kampen ut.

Nye spelarar

I tillegg til at fleire spelarar no er tilbake frå skadeopphald har det kome til nokre nye.

– Preben Borgen trente litt med oss i vinter, men er først no med oss for fullt.

– Joakim Hovden har òg kome til Søfteland etter opphald i Os og retur til Lysekloster. Fleire av oss har jo trent saman i mange år og det var mykje bra spel og fine skåringar, synest Racic.

Søfteland står med 6-3-5 og ligg på 5. plass med 21 poeng etter 14 kampar.

Nore Neset i naboavdelinga har gjort det endå betre i ny divisjon. Dei står med 9-1-5 og ligg på 4. plass med 28 poeng på 15 kampar.

Fleire saker