2 standup-show på 12 dagar
VINN BILLETTAR: I november kjem Dag Sørås sin D-Dag til Irish Cat, laurdag får osingane førpremiere på bergensarane sitt juleshow.
– Radikal, hardtslåande og kunnskapsrik, årets nykomar i 2007 Dag Sørås er blant dei fremste innan standup i Noreg og har turnert heile Noreg til jubel og god kritikk.
– Sørås sitt show D-Dag er det einaste soloshowet og er det største vi byr på i år, seier Jon Hægland som med standupklubben Råkt Opp & Ned har arrangert show på Irish Cat med jamn frekvens gjennom 2012.
Dag Sørås (les meir om Sørås nedst i artikkelen) stiller på Irish Cat torsdag 8. november, men no har det dukka opp eit tilleggsshow i forkant, allereie førstkomande laurdag.
– Vi har vore så heldige at vi har fått førpremiere på Stand-Up Bergen sitt juleshow. Showet skal gå på Ricks i november og desember, med fire av dei komikarane som har utmerka seg mest i Bergen det siste året.
Grim Moberg, Christoffer Schjelderup, Tomas Nesse og Ole Soo står på plakaten for juleshowet (les meir om desse lengre nede i artikkelen).
Ulik aldersgrense
Medan Sørås sitt show, som går på ein torsdag, har 18-årsgrense, blir det 20 år på juleshowet.
– Vi har hatt veldig godt besøk på klubbkveldane våre, også av vaksne, men snittalderen kunne fint vore endå høgare.
– Dette er underhaldning som passar like godt for dei som har fått barnebarn, forsikrar Hægland.
Vinn billettar!
Send oss rett svar på oppgåva under, innan torsdag 25. oktober klokka 23.00, og du er med i trekninga av ein av to plassar på gjestelista til juleshowet (vedri kr 150 per stk).
Skodespelar Eddie Murphy starta karrieren sin som standupkomikar. Fleire av showa blei filma, send oss namnet på minst éin av desse showa/filmane.
Send svaret ditt til kjetil@midtsiden.no. Ta med mobilnummer i eposten.
OPPDATERT
Desse to har vunne kvar sine plassar på gjestelista til juleshowet laurdag 27. oktober: Linda Skaftun og Joachim Dalland.
Om juleshowet
Juleshowet laurdag 27. oktober blir med desse komikarane:
Grim Moberg: Vossingen som var konferansier på den første klubbkvelden på Irish Cat er no tilbake - med nye tekstar - men med mimikk og intensitet som er på grensa til å vera skremmande.
Christoffer Schjelderup: Gudfaren som var med å starta Stand-Up Bergen, klubben som dei siste åra har blitt rekna som den mest progressive standupscenen i Noreg. I tillegg er han ein av dei mest morosame, og spyr eder og galle på alt og alle som fortener det.
Tomas Nesse: Mitraljøsen frå Fana er den første komikaren vi har to gongar på rad. Manøvrerer seg elegant gjennom kva som helst av tema, blant anna vodkashots på eit russisk julebord ...
Ole Soo: Debuterer som juleshowkomikar. Yrkesmilitærmannen fortener det etter å ha levert stødig sidan starten for corka tre år sidan. Fekk fantastisk respons sist han var i Os!
Les òg: Soo vittig du e'
Soloshow med Sørås
D-Dag med Dag Sørås er standupklubben Råkt Opp & Ned sitt første soloshow.
Sørås fekk gjennombrotet sitt som sidekick til Håvard Lilleheies Showman i 2010, og han hadde det same året sin eigen satiriske humorserie ”D-Dag” på VG Nett.
Dag har også vore å sjå på blant anna I kveld med Ylvis og Roast på Chat Noir. Han var også hovudinnslaget under Showmans standup-spesial som gjekk på TV2 i januar 2011.
Nordlendingen Sørås sin humor er først og fremst brutalt ærleg, anten det handlar om han sjølv eller verda rundt han. Han er dagsaktuell og bruker mykje samfunnsrefsande materiale, fint blanda med erfaringar frå hans eige psyke familieliv.
Dag Sørås har blitt kalla ”et glitrende lyspunkt på en ellers grå norsk standuphimmel” (Dagbladet), ”anarkisthumoristen som biter mest og oftest” (Aftenposten) og ”en av landets fremste scenekomikere” (Haugesunds Avis).
– Dag Sørås foreslo "lokal support" som oppvarming. Så det blir anten underteikna, Terje Søviknes eller Olve "Abbath" Eikemo, seier Jon Hægland.