20 nye rekordar - til no denne sesongen!

I helga blei landsmeisterskapen (NM for aldersbestemt) arrangert på Furumo, og Sverre gjorde det same som i fjor, droppa 1000 meter og 3000 meter.

- I fjor debuterte eg i junior-VM like etter, og av same årsak prioriterte eg også i år å berre gå dei distansane eg òg skal gå i VM til helga, seier Sverre til midtsiden.no.

To nye rekordar

Sjølv om han er i oppkjøring til eit viktig meisterskap, gjorde Sverre som han har gjort sidan han var 12 år, gjekk raskast under LM.

Med 38,72 på 500 meter og 1.55,08 på 1500 meter blei det ny meisterskapsrekord.

- Eg er mest nøgd med 1500-meteren. Målet var å gå dei tre rundane så like som mogleg, og eg klarte 29,5, 29,7 og 30,1. Og eg var ikkje sliten då eg kom i mål, så eg kan opna hardare i junior-VM.

Håpar på topp 10

I kveld trenar Sverre på sykkel, tysdag skal han på Slåtthaug og onsdag går turen til junior-VM i Polen.

- Fredag er det 500 og 3000 meter, laurdag 1500 og 5000 meter. Det er 1500 og 3000 eg er best på, seier Lunde Pedersen.

I fjor VM-debuterte han i Kina. Sverre seier sjølv han merka at han var prega av den lange reisa tett på arrangementet.

- Eg fall på 1500-meteren, men det var ei grei erfaring å ta med seg. I år satsar eg på god plassering, å hamna blant topp 10 er målet.

20 nye rekordar denne sesongen

Til no denne sesongen har Sverre sett til saman 20 rekordar. I tillegg har han endå fleire rekordar frå før.

Sverre har blant anna noregsrekordane på 500, 1000, 1500 og 3000 meter både for 12, 13 og 14-åringar.

Etter denne sesongen har Sverre heile tre sesongar igjen som junior, men har med 1.14,59 også meisterskapsrekort for junior sprint på 1000 meter.