22.000 på Tysnesfest
Rekord på rekord over fjorden: – No er det også fullt hus på dei mindre arrangementa, det er eit eventyr, seier festivalsjef Sigvard Madsen.
Bildeserie:
Tysnesfest har auka frå 15.000 besøk i 2010 til 21.981 selte billettar til ulike arrangement i 2012.
Når det kjem til enkeltarrangement blei DDE sin rekord med 4.100 på konsert i 2010 smadra med 5.345 på fredag, då Bjørn Eidsvåg, Gabrielle, ORBO & The Longshots og Kaizers Orchestra spelte på Tysnes.
– Heile festivalen, frå onsdag til søndag, har vore fantastisk, seier Madsen om rekordfestivalen.
– Folk ville ledd av oss
Tysnesfest har vist mot og vilje til å få til noko stort heilt frå starten, også når det kjem til pengebruk og hyring av artistar. Dei kjører ikkje berre på med store namn kveld etter kveld, men fleire kjente band og musikarar same kveld, som i år, med blant anna Stine Larsen og Kim Larsen & Kjukken torsdag, Bjørn Eidsvåg og Kaizers Orchestra fredag og Aqua og CC Cowboys laurdag.
– At folk er klare for flotte konsertar kveld etter kveld er ikkje til hinder for at vi kan laga fleire små arrangement, at vi kan ha noko for einkvar. Snarare tvert imot, no har vi fullt opp på det meste, ting som folk ville ledd av om vi sette på programmet for fem år sidan, seier Sigvard.
Han nemner "Opplev Tysnes - ein ellevill O-fagtime i ekspressfart med Tysnesbussen" som eksempel.
– Vi hadde smikkfull buss med Anders og Marcus som guidar. At vi har så mange og så flinke som engasjerer seg er nok nøkkelen til suksess, trur festivalsjefen.
Tidobla folketalet
Tysnes hadde 2.766 innbyggarar ved inngangen av 2012. Under Tysnesfest klarer dei nesten å tidobla talet på innbyggarar, trass i at dei er avhengige av at dei aller fleste set seg i båten eller på ferja for å koma fram.
– Eg trur vi passerte 500 båtar i hamna, og på den utvida campen hadde vi 1030 som budde i telt.
– Kvar alle kjem frå veit eg ikkje, men hyttefolk og folk frå nabokommunane er viktioge gjestar saman med enkelte som reiser ein del lengre for å få med seg festen og folkelivet.
Bestefar seier takk
Etter ein morosam dag på Våge på dagtid laurdag heldt det fram med Marit Larsen, Markus Krunegård, Aqua, Brighton og CC Cowboys utover kvelden.
Les òg: Full fest - også på dagtid (bildeserie og video)
– Dette er ikkje ein stad du går frå, det er ein stad du blir verande, seier Erlend Lekve, også kalla Bestefar Lekve i venegjengen "Halhjem Drikkelag".
Gjengen stilte uniformert i eigne gensarar og hadde rigga seg til med eit 45 kvadratmeter stort telt på campen.
– Eg vil på vegne av Halhjem Drikkelag seia tusen takk til Tysnesfest-arrangørane, helga har vore heilt fantastisk! seier Bestefar Lekve.
I bakgrunnen gav Aqua gass med gamle hits som Barbiegirl, My Oh My og Cartoon Heroes.