270 frivillige klare

Formannskapet inviterte tysdag Ole Reinert Berg-Olsen og Tor Egil Hylland frå Osfest til møtet for å få ein status og oppdatering på korleis planlegginga går.

– Vi er godt i rute og har inngått samarbeid med mellomanna Oseana, Peppes og Solsiden.

– Fleire kjem til å koma. Det skal bli liv frå Oseana til grusbanen dei to dagane, fortalde Ole Reinert Berg-Olsen, som hadde eit par hemmelegheiter han først vil røpa 6. mars.

Har 270, treng 350

Den 6. mars arrangerar dei nemleg frivilligsamling i Oseana og då lanserast tre nye artister. Allereie er DumDum Boys, Eirik Søfteland og Gina Aspenes på plakaten.

– Vi har fått 270 frivillige, men treng framleis fleire.

– Det er berre å ta kontakt anten på Amfi Os kor vi står med stand i helga eller på heimesida vår.

– Vi treng rundt 350.

– I tillegg er billettsalet så smått i gang. Eindel firma har kjøpt festivalpass, fortalde Berg-Olsen.

Satsar på opptil 2500

Dei to arrangørane fortalde at dei har god kapasitet på grusplassen.

– Vi kan ta opp mot 2500 publikumarar i samband med konsertane.

– Men det er ikkje berre der det skal skje. Det blir vorspiel på Peppes, barneteater i Oseana, liv og røre på hamna, så heile sentrum skal få ta del i festen.

Håpar på 1 million

Til no har arrangørane fått med seg sponsorar til ein verdi av vel 500 000 kroner.

– Vi har håp om å koma opp i mellom 700 000 og éin million.

– Vi har fått KUP-midlar frå kommunen, Griegfoundation på laget og Magnorvindauge og Skaathun Bilverksted som hovudsponsorar.

– I tillegg er det eit 20-tals firma som er inne og bidreg, fortalde Tor Egil Hylland før han fortalde korleis dei er organisert som AS og med autorisert rekneskapsførar og revisor.

– Vi skal gjera det profesjonelt og skikkeleg.

Vil vera med på Wow-faktor

Orienteringa blei godt motteken frå formannskapsmedlemma.

– Dette var betryggande informasjon.

– Det første arrangementet blir ufatteleg viktig. De har eindel flinke arrangement som de blir målt opp mot.

– Om det handlar å prioritera pengar, så er det viktig første gongen å skapa ein wow-faktor. Eg er ikkje framand for å vera positivt innstilt om det kjem ei henvending om å bidra for å skapa nok ekstra denne første gongen, fortalde Lars Atle Skorpen (Ap), før han presiserte at ei ekstraløyving i år, ikkje ville skapa presedens for dei kommande åra.