36 timar for manglande rekneskap

Nordhordland Tingrett dømde denne veka ein styre- og dagleg leiar frå Os til 36 timar samfunnstraff for ikkje å ha ført rekneskap for bedrifta han leia det siste året før verksemda blei slått konkurs våren 2011.

Mannen i midten av 40-åra var tiltalt for ikkje å ha fulgt bokføringslova då han unnlot å sørgje for føring av verksemda sine rekneskap frå januar 2010 fram til konkursen. I tillegg var han tiltalt for ikkje å ha utarbeidd og sendt inn årsrekneskap og -beretning for 2009 til rekneskapsregisteret.

Han skal heller ikkje ha sørga for forskuddstrekk av utbetalt løn til ansatte i selskapet for dei fem siste terminane i 2010. Eit beløp som først var berekna til vel 800 000, men som seinare blei nedjustert til vel 570 000 kroner.

I rettssaka fremja Os kommune ved skatteoppkrevaren eit erstatningskrav på snaut 370 000 kroner for manglande innbetaling av skatt.

Gav uforbehalden tilståing

Den sikta mannen gav i retten ei uforbehalden tilståing, noko retten la til grunn då dei satte straffa til 36 timar samfunnstraff.

I formildande retning er det lagt vekt på sikta sin uforbehaldne tilståing og samtykke til forenkla pådømming, skriv retten i kjenninga. Dommaren er einig med påtalemynda at det ville blitt idømd samfunnstraff på omlag 45 timar om sikta ikkje hadde tilstått.

I høve til skattekravet har bedrifteigaren inngått ei forliksavtale med bostyrar om betaling av dette, noko som gjorde at retten ikkje fann grunn til å pådømme dette jamfør straffeprosessloven § 432 andre ledd.