5 år med aukande besøk

20. september 2006 sidan opna dørane til Osbadet med musikk, kake og taler. No fem år etter lurar dagleg leiar Leif Gunnar Borgen på kor åra har blitt av.

- Tida har gått utruleg fort sidan vi opna for fem år sidan.

- Den gongen var eg sjølvsagt spent på korleis tilbudet ville bli teken i mot og om folk ville bruka oss, fortel Borgen.

På opningsdagen var dei spent på om det ville stå kø langt nedover idrettsvegen eller om det ville koma folk i det heile tatt.

- Sjølve opningsdagen blei relativt roleg, men tida etterpå har blitt alt anna enn roleg.

Dei fire første åra har besøkstala lagt på omlag 63.000 gjestar per år.

Då ein planla badet fulgde ein ei norm som favna i ei to milsomkrins.

- Normen tilsa at vi skulle ha omlag 50.000 besøkande kvart år. Den har vi sprengt kvart år, fortel ein nøgd dagleg leiar.

Barnefamiliar trivs

Då vi spør Borgen om kva type tilbakemeldingar han har fått dei fem første åra fortel han at dei har truffe godt i høve til barnefamiliar.

- Tilbakemeldingane går på at folk tykkjer det er eit åpent godt anlegg kor det er oversiktleg, varmt og godt.

- Det, saman med at vi har aktivitetar tilpassa denne målgruppa trur eg er noko av nøkkelen til dei høge besøkstala.

Blitt ein møteplass

Borgen hadde tre målsetningar då han tok til på jobben som dagleg leiar i Osbadet.

- Vi skulle driva sunt økonomisk, ha eit godt arbeidsmiljø og vera ein møtestad for all aktiviteten på Kuventræ.

- Eg føler vi har lykkast med alle tre tinga.

- Ungdom og andre samlast anten dei skal i badet, hallen eller ut på fotballbanen.

- Eg er veldig spent på om planane om eit sentralidrettsanlegg her opp lar seg realisera og om tankane for ei idrettsline på gymnaset får gjennomslag. Om det skjer trur eg badet kan bli ein enno viktigare samlingsplass, seier Borgen.

Lågt sjukefravær

Dei tilsette i badet har vore ein viktig suksessfaktor for at gjestane har trivdes.

- Uten dei eg har med meg i staben hadde kvardagen vore heilt noko anna.

- Alle tilsette gjer en fantastisk jobb og står på for at gjestane skal trivast og ha det kjekt, skryt Borgen.

Eit parameter på at dei tilsette òg har det bra er det låge sjukefråværet. I dei fem åra Borgen & Co no legg bak seg har sjukefråværet vore under 1%.

Lærarane imponerer

Skulebading har vore ein viktig aktivitet på dagtid i Osbadet.

- Eg trur Os kommune har ei av dei beste skulebadingane i landet.

- Dette er mykje takka vere måten kommunen har organisert badinga på, meiner Borgen.

Med to tilsette som har eit overordna ansvar for opplæringsplan og aktive sumjelærarar som legg tilrette for elevane har kvaliteten på opplæringa blitt utruleg bra i følgje Borgen.

- Eg er imponert over det som gjerast sentral i kommunen, men ikkje minst det lærarane gjer i høve til skulebadinga.

- Vi er heldige i kommunen som har så dyktige folk, skryt Borgen.

I tillegg har svømmeklubben etablert seg med eit fast og godt tilbod kor talenta gror fram. Borgen gler seg til å sjå talenta veks fram og å sjå kor langt dei kan nå når dei kjem opp i seniorklassane.

- No planlegg svømmeklubben eit stemne i november. Det skal bli utruleg kjekt.

Ta vare på anlegget

Den viktigste oppgåva for framtida trur Borgen blir å ta vare på det ein har klart å byggje opp både av omdømme og anlegg.

- Vedlikehald i badet tek vi fortløpande.

- No er vi i gang med å pusse opp rundt idrettshallen i tillegg slik at anlegget får ein heilskap og framstår som det flotte anlegget det er. Det å ta vare på heile anlegget trur eg blir den viktigste oppgåva.

- Kva med utvidingar og nye aktivitetar då?

- He, he vi tenkjer jo på litt forskjellig. Kanskje eit utandørsbasseng eller ei ny sklie hadde vore noko, ler Borgen som samstundes presierar at dette er berre lause tankar ein har lekt med.

Jubileumet feirast i dag tysdag med inngong til 5 kroner, kaffi, hotdog og andre ting har same jubileumspris.