5. og 2. plass til Espen og Klas
Espen Rognsvåg, Klas Færøvik og Kjetil Styrvoll gjorde det skarpt i kvar sine løp i helga.
To motbakkeløparar frå Os deltok i kvar sine lokale løp i helga.
Laurdag var Klas Færøvik og Kjetil Styrvoll i sving i Stego Opp på Kalandseid.
Stego Opp er 1.765 meter lang og 214 høgdemeter opp.
Klas vann klassen sin (35-49 år) og kom på 2. plass totalt med tida 10:11, 8 sekund bak vinnaren Øyvind Loftås (20-34 år).
Kjetil Styrvoll kom på 2. plass i same klasse som Klas og på 4. plass totalt.
God start i Blåmannsløpene
Søndag stilte Espen Rognsvåg til start i Blåmannstrippelen for første gong.
– Eg hadde ein skade i leggen som eg oppdaga på trening måndag førre veke, men bestemte meg for å delta og det gjekk ganske bra, seier Espen.
Espen hamna på 3. plass i klassen sin (menn senior) og 5. plass totalt etter å ha brukt 33:32 på den 6,5 km lange løypa (500 høgdemeter).
– Dette er eit godt utgangspunkt for dei to neste løpa, som er meir kupert, noko som passar meg betre enn jamn og samanhengande stigning.
Blåmannsløpene er tre ulike løp i meir eller mindre same terreng, men med ulik start frå løp til løp. Neste løp er om to veker.
Også mor til Espen, Turid, deltok. Ho kom på 3. plass i sin klasse (50-54 år) med tida 52:06.