79 baklengs på to kampar - trenaren tar likevel av seg hatten

Damelaget til Os spelte i helga to bortekampar på Austlandet. Oslo-Studentenes IK og Runar ligg midt på tabellen, mens Os reiste til Oslo med éin siger på dei første 7 kampane.

Etter tap 40-19 for Oslo-Studentenes IK laurdag blei det 39-26 mot Runar søndag.

– Det er kanskje vanskeleg å tru, men vi hadde ein veldig fin tur. Humøret er på topp og stemninga er god mellom spelarane. Oppvarminga og innstillinga til kampen søndag er kanskje det beste eg har sett av jentene, dei er utruleg gode på å nullstilla seg, eg tar av meg hatten for den haldninga heile laget viser, seier hovudtrenar Gitte Torp.

– 17 minutt ut i kampen mot Runar var det uavgjort. Men vi har dessverre nokre faktorar som øydelegg for oss.

– Derfor blir det stygge siffer

Å nullstilla seg betyr ikkje å gi blaffen i resultata. Både trenarane og spelarane er fortvilte over dei mange baklengsmåla.

Dei er òg klare over årsakene.

– I etablert angrep er vi gode, i etablert forsvar er vi gode. Men vi kan bli utolmodige i angrep, og vi er dessverre for dårlege på å koma oss heim når vi brenn sjansar.

– Når vi både er utolmodige i angrep og vi ikkje får alle tilbake i forsvar raskt nok, så blir det dessverre stygge siffer.

I helga blei det òg nokre tette utvisingar, tre på rad i den eine kampen, og desse blei Os straffa hardt for.

Botnkamp om ei veke

Os sin neste kamp er heime mot botnlaget Stord. Kampen går tysdag om ei veke.

– Dette er ein kamp vi bør levera i. Ikkje berre i periodar, men i resultat, meiner Gitte.