90 plassar, 35 nye

På formannskapet si budsjettkonferanse tysdag og onsdag denne veka presenterte kommunalsjef for helse, omsorg og beredskap, Nils Petter Borge dei første skissane for utbygginga av Luranetunet.

– Det er viktig å presisera at dette er ei skisse, men vi har teikna inn 90 plassar i første byggetrinn.

– Det vil gje oss ei netto tilvekst på 35 nye plassar, forklarte kommunalsjefen.

Nok, men ikkje for mykje

Kommunen ser for seg å bygga ut i tilknyting til dagens omsorgsbustader på Luranetunet, med ein overbygd tropehage i midten.

– Vi skal bygga ut omsorgsbustader og institusjonsplassar fram mot 2020.

– Det ligg ei utfordring i å finna rett nivå. Vi kan ikkje berre byggje ut og tenkje at vi kan la plassane stå ubrukt i påvente av pasientane.

– Då vil vi ikkje få støtte frå Husbanken, fortalde Borge, som refererte til Time kommune, kor ein hadde bygd 30 plassar, men tenkt å nytta 8 i første omgang. Dei fekk ikkje støtte for meir enn åtte.

– Men går det ikkje ann å nytta dei som avlastningsplassar, undra Marianne Hjelle (Frp).

– Nei, det er difor vi ser for oss ei trinnvis utbygging. Dei 90 plassane erstattar mellomanna dagens sjukeheim, så kan vi bygga om den etterpå.

Dette ser kommunalsjefen for seg i første byggetrinn:

• Ny sjukeheim i tre etasjar som ei lenging av eksisterande kantinebygg på Lurane.
• Totalt 60 plassar; 40 korttidsplassar + 20 langtidsplassar
• Treningsrom - rehabilitering/trening
• Omsorgsplassar for demente; 20-30 nye omsorgsbustader ves aust-stova.
• Dagsenter og korttidsplassar for demente; Bygga om nord-stova til formålet.
• Lokale for frivilligheit
• Auka areal for administrasjon

Drifta vil kosta

Ikkje berre vil sjølve utbygginga kosta. I økonomiplanen legg rådmannen opp til å investera 220 millioner kroner på Lurane. Også drifta innan helse- og omsorg må styrkast i åra som kjem.

– Kostnadane for drift vil ikkje få konsekvensar for 2015-budsjettet, men for framtida.

– Vi kan rekna ein gjennomsnittspris på ein plass på 900 000 kroner, i tillegg kjem det 6-800 kroner per kvadratmeter i drift og vedlikehald av bygnadane.

– Med 35 nye plassar, og ei utviding på omlag 3 300 kvadratmeter vil det gje ei årleg brutto kostnad på omlag 34 millionar kroner, fortalde kommunalsjefen, som presiserte at nettokostnaden vil bli noko lågare.

– Inntekta er vanskeleg å berekna spesifikt. Det kjem litt ann på kva form vi vel, kor mange av dei blir korttids- og langtidsplassar, og kor mange av dei blir institusjonsplassar.

– Vi vil i løpet av 2015 komma tilbake med reknestykker som vil gi betre oversikt over nettokostnadane.