Aktiv dag i Strandebarm
Skyting med pil og boge, kasting av frisbee, song og dans sto på programmet då psykisk utviklingshemma frå fire kommunar var samla i Strandebarm laurdag.
Bildeserie:
Tidlegare har det vore arrangert vinteraktivitetsdag for psykisk utviklingshemma på Sjusete i Strandebarm. No har to frå kultureininga i Os kommune og ei frå Kvam Kulturkontor gått saman om å laga ein ny, årleg aktivitetsdag i tillegg.
– Kristin Vangsnes Bøe, Lillian Kvamsøy og eg hamna tilfeldigvis i same klasse på Høgskulen no når vi skulle ta etterutdanning.
– I staden for å laga ei hypotetisk oppgåve, fann vi ut at vi ville gjera ei særs realistisk ei med å arrangera ein aktivitetsdag, fortel Bente Borghild Hauge, fritidsleiar for PU i Os.
Fire kommunar var med
Laurdag møttest glade brukarar og støttespelarar frå Os, Kvam, Askøy og Osterøy i idrettshallen på Strandebarm.
– Det blei mykje glede og ivrige deltakarar.
– Før lunsj var det full fart i idrettshallen med løping, hopping, skyting på blink med pil og boge, kasting av frisbee og erteposar og mykje meir.
– Etter ein hotdog-lunsj kom osingane Anne Leni Sæbø Søfteland og Terje Neset for å gje gruppa ein musikalsk oppleving.
– Fleire av desse menneskja er språklause, men musikk er eit universelt språk som alle forstår, så alle deltok på sin måte, fortel Hauge.
Cowboy-show og afrikanske rytmer
Det heile blei avrunda med ei storslått avslutning.
– Etter middag og dessert viste deltakarane kva dei hadde øvd på saman med Anne Leni og Terje.
– For støttekontaktar og frivillige frå Strandebarm showa dei med cowboy-songar med innøvde moves, afrikanske trommar, norske folketonar og italienske opera-ariar.
– Alt med ei innleving og glede at vi som såg på blei heilt blank i auga og tette i halsen, smiler Hauge.
Etter showet fekk deltakarane velfortente gullmedaljar.
– Dei som ikkje sprang fortast eller hoppa høgast tok det att på ei enorm livsglede, avsluttar fritidsleiaren.