Alexander Heggland var i full sving med å montera juletre då Midtsiden i dag var innom butikken som er under innreiing. (Foto: Kjetil Vasby Bruarøy)

Alexander har fått nye bein å stå på

Alexander Heggland fekk nesten knust golfdraumen av skadar og mislykka operasjonar. Torsdag debuterer han som kjøpmann.

image
image
image
Av: Kjetil Vasby Bruarøy

Helge Heggland, som signerte kontrakt med Mekk-kjeda veka etter at han blei pensjonist, venta med å informera familien til han hadde fått tilslaget.

– Eg hadde heller ikkje takka ja om ikkje familien var med, sa Helge då det i oktober blei kjent at Mekk kjem tilbake til AMFI Os.

Både kona Suzie, som er rekneskapsførar, og dottera Anne-Lise, blir å sjå i butikken. Men sonen Alexander (25) kjem til å jobba fulltid.

– Kva var alternativa for deg i forhold til jobb, eventuelle studie eller å bli kjøpmann?

– Å spela golf på heiltid har vore draumen lenge, men grunna skade i kne og ankel er eg sett litt tilbake. Då pappa kom med forslag om butikk, og vi kan gjera dette saman, slik at eg ved behov kan få fri for å spela golf, så passar det veldig bra.

– Å vera kjøpmann er heilt nytt for meg, men vi har fått god oppfølging og opplæring av kjeda, og vore i butikken i Drotningsvik for meir praktisk informasjon.

På veg tilbake

Han har hatt 6 operasjonar på 4 år. I 2015 gjekk Alexander åtte månadar på krykker.

– Ikkje alle operasjonane gjekk som dei skulle, så då måtte det gjerast på nytt. Men no trur eg alt er bra, og formen byrjar å koma igjen, seier Alexander.

Den talentfulle golfspelaren vann nyleg klubbmeisterskapen og sette ny banerekord på Hauge. Han er òg aktiv som trenar for juniorane i Bjørnefjorden Golfklubb.

– Eg kjem til å jobba fulltid i butikken, og no om vinteren blir det ein del trening i simulator, som eg fint kan ta etter stengetid. Skal eg på turnering så tar eg langhelg, så får eg heller jobba meg opp litt avspasering dei andre vekene.

Målet er å koma inn igjen i noregscupen. For å klara det, etter ei stund vekke, må han få eit wildcard, for eksempel ved å gjera det skarpt i ei anna turnering.

Heim frå Lanzarote til ny butikk

Torsdag opnar den nye butikken, og familien får truleg ein lang og travel opningsdag då det er nattope.

For å stilla utkvilt til 14 timar med opningsfest har familien nyleg vore på Lanzarote.

– Vi har hatt tilsette på plass i butikken, elles har både kjedekontoret og leverandørar gjort ein fantastisk jobb! seier Helge Heggland.

– Det blei ein del jobb på oss òg, via internett, men vi fekk oss to dagar på golfbanen i varmen.

Måndag kveld kom dei heim frå Kanariøyane, no er det siste innspurt før opning.

Fleire saker