– All ropinga var det mest dramatiske
Lokalpolitikar Ingrid Netland var med på flyet som nødlanda på Gardermoen i går.
Brannbilar, ambulansar og luftambulanse rykte i går ut til Gardermoen då det søndag kveld blei slått alarm frå eit fly på veg til Chania på Kreta.
Det var oppdaga feil på eit av hovudhjula etter avgang og flyet, som er av typen Airbus A321, måtte returnera til Gardermoen for å ta ei nødlanding.
Flyet landa utan problem på Gardermoen klokka 21.14, men skader på ei av vengene viser at det var grunn til å slå alarm.
Sjå bilde av skadene på TV2.no.
Om bord i flyet sat 191 passasjerar. Blant dei var Ingrid Netland frå Os.
– Landinga var verst
Lokalpolitikar Netland var på reise åleine, på veg for å feriera med broren og familien hans på Kreta, då det kom melding om skade på flyet.
– Først høyrdes det dramatisk ut, så blei det heile avdramatisert. Men akkurat då vi skulle landa auka dramatikken, eg var ikkje førebudd på det som tydelegvis er rutine under nødlanding, at flyvertinnene nærmast roper over høgttalarane «bøy deg fram, bøy deg fram, bøy deg fram», samanhengande i cirka fem minutt.
Flyet var over to timar i lufta, for å bruka bensin så flyet skulle bli lettare før landing. I forkant av sjølve landinga fekk folk beskjed om å fjerna alle kvasse gjenstandar, ta av seg briller og liknande, og å sitja framoverlent i nødlandingposisjon.
Gråt og latter
Ingrid fortel at dei to timane i lufta var utan servering, og med naudlysa på.
– Det var ei litt pressa stemning om bord. Nokre gret, andre hadde små anfall med litt hysterisk latter. Men folk var stort sett rolege.
– Men akkurat under landinga blei det fleire tårer, det var ein del ungar som gret.
Netland var ikkje førebudd på alt oppstusset etter landing.
– Då vi såg det store oppbodet av redningspersonell og presse forsto eg alvoret. Vi blei skjerma og tatt inn på flyplassen for debriefing. Opplegget var bra, det var også helsepersonell på hotell vi brukte natt til i dag.
Måndag er Ingrid på plass på Gardermoen igjen, for å reisa til Kreta éin dag etter skjema.
Ho kvir seg ikkje til flyturen.
– Alt i alt trur eg det var verst for dei på bakken, seier Ingrid, som no gler seg til å koma ned i varmen.