Lokal | 14. apr. 2011

Allereie bestilt i 2016

Dei mest populære selskapslokala i bygda opplever stor pågang lang tid i forkant.

Allereie bestilt i 2016
Andris Hamretorsdag 14. apr. 2011 06:11

Våren er høgsesong for selskapslokala i Os med konfirmasjonar og bryllup.

- Vi opplever ofte at mange bestiller lokala eit år eller to i forkant, seier Bjørg Bergstø ved Oselvarnaustet når ho blar gjennom reservasjonane for dei komande åra.

- Vi har allereie nokon som har bestilt til konfirmasjon i 2016, fortel Bergstø.

2011 og 2012 har godt belegg med nokre ledige helger innimellom.

- Skal vi sjå, 2013, 2014 har vi òg eit par bestilling på, men 2015 har det førebels ikkje kome noko på enno, smilar Bergstø.

- Svært mange av dei som bestiller så tidleg er gjengangarar, folk som anten har hatt eit selskap her tidligare, eller som har vore her på ei tilstelling og likt seg her.

Driv på dugnad

Oselvarnaustet blei bygd på dugnad og sto ferdig i 1995. Utleige og vedlikhald av naustet blir fortsatt gjort på dugnad.

- Då vi bygde naustet skar vi tømmeret sjølv. Det meste av arbeidet på naustet er gjort av nevenyttige medlemmar i Oselvarlaget, fortel primus motor og æresmedlem Gunvor Hjelle.

- Vi har hatt fullt kjør frå dag ein og aldri trengt å annonsera lokala for utleige, fortel ho.

Lakkar ved juletider

Oselvarnaustet driv utleige mest heile året, men nokre veker før jul held dei stengt for vedlikehald og lakkering av golv.

- Det er klart at det blir ein del slitasje med ein så høg bruk, så vi har sett oss nøydde til å halda av eit par veker før jul til vedlikehald, fortel dei to damene.

- Dessverre har det blitt moderne med stilletthælar igjen, men det går no bra det òg, smiler dei to.

Stille i juli

Eit av dei andre populære lokala i sentrum er Kløvertun.

- I høgsesongen på våren og hausten går det slag i slag med konfirmasjonar, bryllaup og runde dagar, fortel Thore Lunde, som administrarer Kløvertun på vegne av Os Sanitetsforening.

- Den einaste perioden det er litt rolig er i fellesferien, men det er eigentleg greitt, så blir det litt ferie på oss òg.

Den rolege perioden i juli er ei endring Lunde fortel har kome i seinare tid. Han trur det heng saman med at ferietida og at dei som skal gifta seg gjer det tidligare på sommaren eller seinare på hausten.

Var vigsla

Kløvertun blei for mange år sida vigsla for å brukast som erstatningslokale medan Os kyrkje blei pussa opp.

- Ei konsekvens av vigslinga var at det ikkje var lov å nyta alkohol i lokala på den tida, fortel Lunde.

- Dette må ha gjort inntrykk på folk, for framleis er det folk som trur at dei må ha eit rusfritt selskap om dei skal leiga her.

Lunde slår fast at den tida er forbi. No kan leigetakarane få lov å servera alkohol om dei ønskjer, så lenge dei held seg innanfor gjeldande lovar og reglar.

Fire lokalar i eitt

Mange trur at Kløvertun berre består av det store lokalet i første etasjen, men sanninga er at dei har heile fire lokalar til utleie i huset.

- I tillegg til storesalen, har vi eitt selskapslokale i andre høgda med plass til omlag 30 personar. Og to møterom med rom for 20 og 8 personar, fortel Lunde.

- Om det er nokon som skal ha eit lite møte på dagtid, men manglar ein stad å ha det så kan vi hjelpa.

- Vi har både lerret, prosjektor og nett-tilgang, seier Lunde.

Fullt kjøkken og hjelp

Både Kløvertun og Os Seniorsenter (tidlegare Os Eldresenter) kan skilta med fullt kjøkken kor ein kan laga maten sjølv, eller ha god plass til å legga levert mat på fat.

Begge plassane har i tillegg med i leigeavtalane at den som leiger må ha minst ein innleigd på kjøkkenet.

- Det gjer vi både for å ha nokon som kjenner lokalet om det skulle skje noko, òg for å ta vare på utstyret på kjøkkenet og få dekketøy og anna tilbake på rett plass, avsluttar Thore Lunde på Kløvertun.

Ei oversikt over utleigelokaler med utfyllande opplysningar kjem på midtsiden.no i nær framtid.

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.