- Alvorlege kutt på feil grunnlag

Dei private barnehagane i Os får til saman 12,7 mill. mindre i tilskot i år. Malen Os har brukt har for låg bemanning.

Kjetil Vasby Bruarøyonsdag 09. feb. 2011 10:19

Dei ikkje-kommunale barnehagane i Os får langt mindre i tilskot i 2011 enn i 2010. Forskjellen til saman i dei 13 barnehagane er ifølgje deira eiga oversikt på 12,7 millionar kroner.

- Dette kan få alvorlege konsekvensar for fleire av barnehagane, seier styremedlem i den foreldrestyrte Varhaug barnehage, Bjørn Michelsen, til Midtsiden.no.

I går snakka styreleiar Kjersti Ellingsen med Bergens Tidende (på framsida i dag) og TV2, sjå intervju og innslag.

Sparer 15 millionar kroner
Staten har hatt stor nytte av private aktørar i kampen om å nå målet med full barnehagedekning. Men no skrur dei igjen kranen og går over til rammefinansiering for å få kontroll med utgiftene.

- Ved overgang til rammefinansiering ser vi alltid at det blir færre kroner å dela ut. Vi i kommunenane sit igjen med Svarte-Per, seier rådmann Knut Terje Rekve til Midtsiden.no.

Kommunane kan velja mellom å bruka nasjonale satsar og å samanlikna med eigen barnehage når dei skal berekna tilskot til private.

- Vi har valt å bruka Lysekloster barnehage som mal. Skulle vi brukt nasjonale satsar ville det ha kosta 15 millionar kroner meir, noko som ville gått ut over andre tenester, seier Rekve.

- Bruker feil mal
Til TV2 sa ordførar Terje Søviknes at når dei kommunale barnehagane kan driva rimeleg, så må også dei private kunna gjera det.

I haust var det tilsyn ved barnehagane i Os, og ved barnehagen som blir brukt som mal blei det før jul avdekka at dei hadde for låg pedagogisk bemanning.

- Om ikkje dei har bemanning slik lova krev er det rart at kommunen bruker denne som mal. No må administrasjonen og politikarane tenkja over kva dei vil med desse grove kutta, for risikoen dei tar er både at tilboda til ungane blir langt dårlegare, at fleire mister jobben og at barnehagane får færre plassar.

Rekve seier han ikkje kjenner til dette tilsynet, men at det kan ha vore snakk om mindre avvik, for eksempel at det ikkje har vore full bemanning den første timen om morgonen eller den siste timen om ettermiddagen. I så fall skal ikkje Lysekloster ha vore så feil å bruka som mal.

- At kommunen ber barnehagane ta inn fleire ungar for å driva billigare er også rart, når det er full barnehagedekning seier det seg sjølv at barnehagedrivarane ikkje berre kan henta inn det talet og dei aldersgruppene dei ønskjer, seier Michelsen.

Dei 13 ikkje-kommunale barnehagane i Os har samla seg om eit brev dei har sendt til politikarane med plass i formannskapet og kommunestyret i Os.