Årets julegåve 2

I byrjinga av desember skreiv midtsiden om «Switch Halhjem Skatepark» som trong hjelp frå næringsliv, naboar og andre for å skaffe 335.000 kroner for å fullfinansiera skateparken ved fotballbanen på Søre Neset.

Torsdag fekk vi telefon frå entusiastisk eldsjel Bjørn Madsen som kunne fortelje om årets julegåve til barn og unge i bygda.

- I førre veke var eg og Arthur Botnevik (leiar i Søre Neset IL) på kontoret til Tom Leonsen i kommunen for å fylle ut papira i samband med søknaden om spelemidlar.

- Medan vi satt der fekk Tom ein telefon som han berre rakk videre til meg, med beskjed om at den var til meg, fortel Madsen.

Gamal skater ville støtta

I andre enden var Øyvind Løvdok, grunnleggjaren av Os skateklubb tilbake på 90-talet.

- Øyvind fortalde at han var med på å stifta Os skateklubb og bygde den første rampen på Kuventræ i si tid. Den blei så flytta til Vognhallen med brann og blei aldri bygd opp att.

- Medan dei dreiv Os skateklubb fekk dei «automatmidlar» frå ein av speleautomatane på videoen, forklarar Madsen.

Fekk klump i halsen

Etter å ha lese om initiativet til Switch Halhjem Skatepark hadde Løvdok bestemt at nokre av midlane dei hadde ståande på kontoen skulle gå til å realisere prosjektet på Halhjem.

- Eg rekna jo med at det var snakk om opp mot 10.000 kroner eller noko slik og kjente det snørte seg i halsen då Øyvind sa at vi skulle få 100.000 av dei 130.000 kronene dei hadde ståande på kontoen, smilar Madsen.

Øyvind Løvdok er oppteken av brett både på snø og hjul. Dei resterande 30.000 skal kulturkontoret få disponera og nytte til gode initiativ anten det er skaterar eller brettkøyrarar som står bak initiativet.

- Øyvind satte som ei betinging at det er barn og unge sjølv som skal styre desse midlane i saman med kulturkontoret, forklarar Madsen.

Manglar lys og 100.000

Det er ikkje berre Løvdok som har falt for initativet til skaterane på Halhjem.

- Tysdag blei det halden ekstraordinært årsmøte i Søre Neset IL kor skaterane blei tekne opp som eige gruppe i idrettslaget. Samstundes bevilga idrettslaget 50.000 kroner til prosjektet, fortel Madsen med eit smil.

- No manglar vi berre vel 100.000 kroner for å kome i mål med prosjektet slik som vi har skissert det.

- Jo meir pengar vi klarar å få inn, jo betre blir anlegget.

Sundag var skaterane ute med bøsser og samla inn omlag 19.000 kroner frå nabolaget.

- Dei siste pengane skal vi klara å reise. Er det nokon som har lyst til å bidra er det berre å ta kontakt, frir Madsen, som òg håpar det finns ein elektrikar eller andre i bygda som har lyst å sponsa anlegget med lys.

- Eg har ein siste gladnyheit til deg. Vi har fått headhunta ein dyktig kar som den første leiaren i skateklubben.

- Kay Even Hægland er en dyktig skatar og eit godt forbilde for dei unge. Vi er difor utruleg glade for at han har takka ja til å vera skateklubben sin første leiar, avsluttar Madsen.