Arne tatt ut til VM

Han kunne ikkje fått ein bedre bursdagsgåve enn beskjeden om at han og makkar Adrian Lindgren er tatt ut til å representera Noreg i dobbeltsculler under U23-VM i Poznan, Polen.

– Det var ein fin beskjed få på bursdagen sin det, seier Arne Hadler-Olsen.

Han sat og åt kake heime hos mor og far då dei oppdaga på heimesida til roforbundet at uttaket var gjort.

– Vi såg det der først, så fekk eg det stadfesta i ei direkte melding omlag fem minutt seinare, fortel 22-åringen.

Ror godt saman

Hadler-Olsen representerer Os Roklubb. I dobbeltsculleren ror han saman med Adrian Lindgren frå Tønsberg Roklubb.

– Det er Adrian eg har rodd saman med fast dei to siste sesongane, men vi har også rodd saman tidlegare, mellomanna i nordisk meisterskap for juniorar som vi vann.

– Kva blir målsettinga i Polen?

– No aner eg ikkje kor mange eller kva nivå som er på dei som er med, men eit naturleg mål er å freiste å koma seg til semifinalen, så får vi sjå korleis det går.

Kvalifiserte seg under "ikkje-optimale forhold"

Dei to roarane har kvalifisert seg gjennom eit stemne i Tyskland og eit stemne sist helg på Årungen, kor dei vann løpa sine.

– Vi har vel ikkje hatt dei raskaste tidane i år, men på Årungen slo vi dei som har vore raskare enn oss. Eg trur det ligg som grunn til at vi blei tatt ut. I begge regattane vi har vore med i, så har det ikkje vore optimale forhold for å oppnå ei superrask tid. Skal ein klare det er ein avhengig av å få litt meir medvind enn det vi har hatt til no, avsluttar Hadler-Olsen som i år har sin siste sjanse i U23-klassa.