Arrangerer stort bubil-treff

Dei gjer det skikkeleg, Norsk bobilforening avdeling Vest, når dei skal arrangera julebord. 74 bubilar, med godt over 150 personar sett kvarandre i stevne på Nore Neset den kommande helga.

– Dei første bilane kjem rullande inn når skulen slutter på fredag.

– For å ivareta tryggleiken, så treng vi tre meter mellom kvar bil.

– Vi kjem difor til å nytta heile plassen utanfor Nore Neset Aktivitetshus, og mesteparten av alle parkeringsplassane opp til Nore Neset Ungdomsskule, forklarar Kjell Vatne, medlem i arrangementskomiteen.

Får demonstrert gassbrann

Nettopp tryggleik står som eit hovudfokus blant bobilentusiastane i helga.

– I tillegg til at brannvesenet legg ut slanger på førehand, berre i tilfelle noko skulle skje, så er vi invitert inn til brannstasjonen.

– Der vil brannvesenet demonstrera brann i eit gassanlegg.

– Vi kjem òg til å få foredrag om kva ein lyt passa på i høve gassanlegg, batteria og det elektrisk anlegg i bilane.

– Du veit, det er mykje utstyr i desse hyttene på hjul, smiler Vatne, som sjølv har sett konsekvensane av brann gjennom 15 år som brannetterforskar.

Første gong på Os

Bubilforeninga har aldri tidlegare vore samla på denne måten på Os.

– Det er ikkje noko problem å finna eit lokale til 150 menneskjer, men å finna parkering til over 70 bubilar, dei største over 10 meter lange, og kor vi har 5,5 meter i bredden til kvar bil er ikkje like enkelt.

Programmet arrangørane har lagt opp til har blitt godt motteke frå medlemma.

– I tillegg til arrangementet på brannstasjonen laurdag er det julebord inne i Nore Neset Aktivitetshus laurdagskvelden.

– Tilbakemeldingane så langt har vore gode, så eg reknar med vi får eit triveleg lag, seier Vatne, som har utfordra ordføraren til å opna festmiddagen med å seie noko om E39, bubilparkering i Os og Osbygda generelt.