Askeladden satsar på auka sal - på Grønland!

Askeladden Boats har fått ny importør og distributør for Danmark og Grønland.

Risbjerg AS har overtatt etter Johs Thornam AS, som har vore importør sidan 2009.

– Rundt 15-16 prosent av omsetnaden vår går til eksport, seier Askeladden-sjef Henrik Askvik.

Sverige er største importør, Finland er nest størst.

Oppunder 100 båtar til Grønland

Askvik fortel at det i periodar har vore ganske godt sal også til Grønland.

– Eg har ikkje eksakte tal, men i mi tid har vi nok selt ein plass mellom 50 og 100 båtar til Grønland.

Han seier forbruket har vore stort og mange av dei same kundane har kome igjen.

– I tillegg til at vêrforholda er røffe har det vore ordningar som har gjort at det ofte har løna seg å kjøpa nytt.

Ny importør

– Danmark har tradisjonelt vore ein god marknad for båt, men kanskje meir for segling enn mindre motorbåtar. I Limfjorden er det likevel bra med mindre båtar òg.

– Men det har vore ein krevjande marknad i Danmark etter finanskrisa i 2008, fortel Askvik.

Johs Thornam AS har vore importør frå 2009 til no, og distribuert via sitt nett av Suzuki-forhandlarar.

– Det har vore utfordrande med denne forretningsmodellen, i ein prispressa marknad, og vi har no blitt einige at tida er moden for endringar.

Risbjerg AS i Them på Jylland vil frå i dag, 1. november, overta som eineimportør av Askeladden-båtar til Danmark og Grønland.

– Risbjerg AS er ein av Danmarks største forhandlarar av båter og har også tidlegare vore forhandlar av Askeladden-båtar.

Selskapet sel frå før, blant anna, Sea Ray, Beneteau og Arvor.

– Med deira kundenettverk i Danmark og på Grønland, i kombinasjon med Askeladden sine nye produkt, ventar vi ei markant auke i salet i åra som kjem.