Åtvarar båteigarar

Frå august til no har det vore fleire tilfelle av tjuveri av båt på Sotra, ifølgje Vestnytt. I starten av september fortalde BA om tjuveri frå minst fem båtar i Fana.

– Vi er inni tid med mykje vêr. Erfaring frå tidlegare år, både i Os og nabokommunane, er dette ei tid vi dessverre ofte opplever tjuveri av båt, båtmotarar og utstyr frå båt, seier politioverbetjent Rune Fimreite.

Det har si naturlege forklaring.

– Dei fleste båtane er førebels ikkje tatt på land, så utvalet er stort for dei som er ute i slike ærend. Samtidig er det mørke kveldar og lågare aktivitet langs sjøen, og på sjøen, og derfor lågare risiko for å bli tatt.

Politiet oppmodar folk om å sjå oftare til båtane sine, og å få dei på land om dei ikkje lenger er i bruk.

– Vi ser òg at fleire båtar sliter seg i uvêret, og hamnar på rek. Dette kan føra til skade på både båten som er laus og andre båtar, i tillegg kan ein båt på rek setja i sving eit større apparat med søk, fram til det eventuelt blir stadfesta at det ikkje har vore folk om bord i båten.