Åtvarar mot bande

Næringsdrivande i Os åtvarar i desse dagar kvarandre mot "Helsingborgbanden", ei gruppe med profesjonelle tjuvar som skal vera på veg til området.

"Dette dreier seg om asiater (kvinner og menn) ofte fra 2-6 stykker som jobber sammen" står det i eposten, som held fram med:

"De stjeler ALT og kan stjele for store summer i en og samme forretning. Disse er PROFFE tyver!"

Butikkdravarar blir oppfordra om å vera merksam og straks melda frå til politiet ved mistanke.

- Omreisande grupper av personar som stel skal vi vera merksame på, dette har i perdiodar vore ei utfordring for butikkdrivarar og politi, seier lensmann Rasmus Dalen.

- Men vi har førebels ikkje fått noko melding om den banden du her siktar til, legg han til.

I meldinga som går mellom butikkar i Os er det bilde av fleire personar som skal vera tatt i butikkar andre stadar i landet. Det er også bilde av legitimasjonen til nokre av dei.

- Kva synes du om at slike opplysingar blir ope utveksla mellom butikkdrivarar?

- Det er naturleg at butikkdrivarane åtvarar kvarandre. Sidan eg sjølv ikkje kjenner til innhaldet i meldinga kan eg ikkje koma med annan kommentar enn at dette bør vera kvar enkelt avsendar sitt ansvar.