Auksjon for Nsumba

Frå klokka 14 til 15 laurdag er det auksjon i Os sentrum. Tove Tvedt Skarstein frå S. Tvedt AS, som har hatt auksjonar i ei årrekkje, har dei siste åra brukt auksjonen under marknadsdagane til å gje støtte til fotballspelarar frå barneheimen Nsumba i Uganda, på veg til Norway Cup.

– Dei plar vera innom Bergen for å spela mot Vadmyra som oppvarming til den store cupen i Oslo. Med midlar frå auksjonen får dei litt ekstra lommepengar, seier Tove, som har fleire butikkar med seg på auksjonen.

– I fjor blei det gjort mange varp, fiskeutstyr til verdi av 2000 kroner gjekk for 400 kroner, gensar frå Instinct gjekk til ein tredel av prisen, nemner ho.

Inntektene går uavkorta til ei god sak. Det er dessutan tre jenter med stand på Os som sel varer frå barneheimen, om du vil handla og samtidig støtta.

– Nsumba barneheim ligg like utanfor Kampala i Uganda og blir driven av stiftinga Bring Children from Street. Rihard Kiwanuka er leiar og er ofte på barneheimen og gjer ein framifrå jobb saman med resten av styret.

– Kvart år tar dei med jentefotball laget til Bergen der dei trener og gjestar Vadmyra idrettslag og drar vidare til Norway Cup. Kven veit, kanskje kan vi i løpet av sommaren oppleva dei på Kuventræ i kamp mot Os-jenter? seier Tove.

Her kan du sjå bilde frå sist Nsumba-laget spelte på Kuventræ.