- Ausa på!
For femte året på rad reiser Ausekarane rundt på Vestlandsfjordane med sin sommarturné. I år kjem dei både til Os sentrum og Øyane.
I fjor avslutta Ausekarane sommarturneen sin i Os. I år er det osingane som får vera først ute til å oppleva dei vestlandske trubadurane.
Startar i Os
28. juni startar karane nemlig sin femte sommarturnè med første konsert på Os. Det blir eit heilt nytt show med tittelen "Farande fant", og frå 28. juni til 21. juli reiser dei rundt i ferja "Showtime" og held 18 konsertar langs kysten.
Etter tidlegare show å døma, kan gjestane venta seg mykje god musikk, humor og sprell då karane går i gong med både eigenkomponerte songar og eigne versjonar av andre artistar sine verk.
Den store hiten deira "Ausedansen" har på ett år hatt over 170.000 visningar på nettstaden Youtube.com.
Frå land til fjord
Suksessen Ausekarane starta i 2007, med musikal-kabareten "Haraball i naustet" som vart sett opp på Logen i Bergen.
Karane med Bjørn Jensen og Tor Endresen i spissen gjorde det stort med showet som var basert på Johannes Kleppevik sine songar og tekstar.
Året etter tok dei med seg showet på fjorden og reiste rundt frå kai til kai under slagordet "Ikkje reis te byd'n - me kjem til deg".
Dette vart ein stor slager og dei hausta lovord frå både publikum og media.
Kjem til Vedholmen
I år er det ikkje berre Os sentrum som får besøk av Ausekarane, dei skal og legga til kai på Vedholmen i Øyane den 15. juli og halda konsert der.
Det kom i stand etter at Ausekarane oppfordra folk gjennom Facbook-sida deira om å melda inn ønskjer på kva stadar dei skulle vitja.
Slagordet "Ikkje reis te byd'n - me kjem til deg" held tydelegvis enda.