Badeplassane i Os

Det er meldt strålande vêr i pinsen! Her kan du sjå bilde frå 17 av dei 22 friluftsområda i Os kommune. Nokre av dei har blitt oppgradert i løpet av vinteren.

Kjetil Vasby Bruarøytorsdag 28. mai 2009 08:20

Av dei 22 friluftsområda i Os kan du nå 14 utan båt (3 av desse er parkeringsplassar), men nokre av dei landfaste er klart lettast å nå med båt, som Ulvesund på Lepsøy og Langøysund i Sørstrøno.

HER ER BILDE FRÅ 17 AV DEI 22 FRILUFTSOMRÅDA I OS
(Vent til sida er ferdig lasta, og trykk på bildet øverst til venstre for å bla gjennom alle)

Vil du sjå alle områda markert i kart kan du sjå www.bof.no

Fekk toalett
9 av friluftsområda i Os har toalett: Ervikane, Oksebåsen, Kalneset, Kuskjeret, Sperrevik, Søvikvågen, Mobergsvikjo - og i 2009 også Skorpo og Skeisstøa.

- Det nye toalettet på Skorpo er i det eine naustet vi har bygd opp igjen. Dette er tilpassa rørslehemma, fortel driftsleiar i Bergen og Omland Friluftsråd, Oddmund Dingen.

Omfattande oppgradering på Skorpo
Skorpo, som er det nyaste friluftsområdet i Os, har fått tre nye grillplassar og to nyoppussa naust. Det store naustet du ser i bildeserien er rive og bygd på nytt. Her går fjøra inn i nausten, slik at ungar kan bada på sandstrand skjerma for sol eller regn. Padlarar kan også svippa innom for å halda seg tørr.

- Det andre naustet blei skadd av stormen Inga. Dette har vi trekt cirka 2,5 meter tilbake og pussa opp. Også dette kan brukast av besøkande, anten dei berre vil skjerma seg litt eller overnatta i sovepose på loftet.

Elevar hjelper til
Det skal byggast brygge rundt dette naustet. Badehuset nærmast stranda er også under oppussing. Her held elevar frå Os ungdomsskule på med å setja i stand omkledingsromma igjen.

- Vi har eit flott samarbeid med ungdomsskulen, det blir nok mange som kjem til å setja pris på innsatsen deira når alt står ferdig, seier Oddmund.