– Barnebarnet (4) ville ha seg ein slurk

Ein lesar som har kontakta Midtsiden-redaksjonen åtvarar mot kjøp av ein viss form for desinfeksjon. Årsaka er flaska den blir selt på.

– Då kona kom heim med denne flaska, sa eg at vi måtte vera varsame, fortel han.

Same dag kom barnebarnet på fire år på besøk.

– «Har du vatn, besten», sa han. Heldigvis tok han ikkje ein slurk av flaska.

Flaska er frå Anolyte og er kjøpt hos ein daglegvareforretning i Os.

– Eg reagerer på at det blir selt desinfeksjon på ei flaske med drikketut. Dei som sel dette bør vurdera å plukka den ned frå hylla, synest bestefaren.

– Og dei som har kjøpt ei flaske som denne bør vera varsame med kvar dei set den frå seg.

Midtsiden har vore i kontakt med den aktuelle butikken. Dei fortel at vara berre har vore i sal i dag, og at den blei trekt tilbake for to timar sidan. Flaska er no ute av hyllene.