Båt har stranda i Moldafjøra

Restane av stormen «Helene» kom til Os onsdag kveld. I dag ligg det mange velta tre og nokre skadde brygger igjen.

Ein turgåar reagerte i går på at ein båt, som har lagt på svai 20-30 meter frå land i Moldafjøra, ikkje var tatt til lunare farvatn før stormen kom.

I dag ligg båten i fjøresteinane.

– Eg og kona går ofte tur i området, og i går snakka vi om at denne burde vore fjerna før stormen kom. No ligg båten i fjøresteinene, og den har nok fått nokre skadar, seier Jens Jacob Lund.

Midtsiden har varsla Os brannvesen, som tar hand om akutt forureining, og som no rykker ut for å sjå på båten.

– Vi håper båteigar dukkar opp, om vedkomande ser saka i Midtsiden, seier Anne Kjersti Storebø.

Det bles framleis litt friskt i Os, og frå fredag kveld til laurdag formiddag er det meldt vindstyrke på rundt 10 m/s frå nord og seinare frå vest.

OPPDATERT: Då brannvesenet kom fram var eigar på plassen. Båten blir tatt hand om.