Båtfyll og hærverk

I Lepsøy-området kom Kystvakta over ein rusa 18-åring i båt. På sjukeheimen kasta nokon stein.

Det har vore ei relativt roleg natt på Os. Operasjonsleiar Ragnar Lyssand ved Hordaland politidistrikt kan melda om at Kystvakta i to-tida i natt kom over ein mindre båt i området mellom Halhjem og Strøno som dei fatta interesse for. Båten vart ført av ein 18-åring mistenkt for promillekøyring.

Politibåten kom til staden og tok han med seg til Os kor betjentar frå lensmannskontoret fekk han framstilt for blodprøve før han fekk gå. Politiet har mistanke om at han førte båten i alkoholpåverka tilstand.

Kasta stein
I halv-to-tida vart det meldt om at nokon kasta stein mot inngangspartiet på sjukeheimen. Resultatet vart at døra fekk ei svær rose i seg, men ho knuste ikkje.

- Gjerningspersonane stakk frå staden før politiet rakk fram, men slik eg forstår har dei litt å gå etter, fortel operasjonsleiaren.