Ber folk koma tidlegare

Med den vidare utbygginga av Os Sjøfront har Oseana fått ei utfordring i samband med arrangementa.

– Fram til no har dei frivillige parkeringsvertane klart å hjelpa folk til å finna parkering framfor Oseana, men no når bygginga har tatt til blir det ei utfordring.

– Det vil rett og slett ikkje vera plass for alle å parkera her, så då må vertane be dei parkera ved Vognhallen eller framfor rådhuset i staden, forklarar Janne Mari Hjelle, marknads- og arrangementskoordinator ved Oseana.

– Kom litt tidlegare

Gjennom dei tre første åra har arrangørane på Oseana gjort seg eindel erfaringar på godt og vondt.

– Veldig mange kjem i god tid og kosar seg her på førehand, men så har vi eindel som kjem rett før framsyning.

– På ti minutt skal dei henga frå seg, kjøpa noko å drikke, gjerne ta ein tur på toalettet før dei skal finna plassen sin i salen.

– Det gjer at vi litt for ofte må halde att artistane slik at alle kjem seg på plass.

– Det er ein situasjon vil helst ønskjer å unngå, så eg har ei lita oppmoding.

– Kom litt tidlegare, og i allefall no når det blir litt dårlegare med parkering. Det tar nokre minutt ekstra å gå frå rådhuset, minnar Hjelle om.

– Men risikerer folk å ikkje sleppa inn?

– I dei fleste tilfella så kan vi "lura" dei inn bakdøra, men Riksteateret, til dømes, tillet ikkje det.

– Er ein ikkje på plass i stolen til rett tid på dei framsyningane, så må ein pent venta utanfor til første pause.