Ber om tips etter dieseltjuveri
Minst to bedrifter i Kolskogen/Kuven har hatt besøk av tjuvar i natt. – Dei har truleg stoppa i grøfta på E39 og brukt slange, seier Kjartan Snorrason.
Måndag morgon fekk politiet melding om tjuveri av diesel frå bilane til Brødrene Borgen Betong på Kuven.
Så kom melding om tjuveri av diesel frå lastebilar parkert på anleggstomta mellom Macbox og Bobil i Industrivegen.
– Ved den eine plassen er det sakna nærmare 1000 liter diesel, ved den andre er det også snakk om nokre hundre liter, fortel politibetjent Kjartan Snorrason.
Stal frå grøftekanten
Politiet er på synfaring i området og har funne sport som tyder på at tjuveriet har skjedd frå E39.
Begge bedriftene ligg nær hovudvegen frå Halhjem og med slange og ein litt større bil kan tjuvane ha tappa diesel direkte frå grøfta.
Ber om tips
– Dette har truleg skjedd natt til måndag. Om nokon har sett aktivitet i området eller bilar i grøfta i natt eller andre tider i helga så er vi interessert i tips, seier Snorrason.
Du treff politiet i Os på 480 02 480.