Fire ungdommar oppsøkte ei adresse sør for Os sentrum søndag kveld. Det dei ikkje viste var at dei blei filma (skjermskot frå overvakingsfilmen)

Ber ungdommane melda seg

Kom i bil for å plaga huseigar, men visste ikkje at dei blei filma. Oppdatert: Beklaga måndag ettermiddag.

Av: Andris Hamre

Ein huseigar i eit nabolag litt sør for Os sentrum har to gongar i løpet av den siste månaden blitt plaga av ungdommar som har ringt på døra og stukke av.

– Første gongen var 17. februar. Då såg kona dei lengre ned i gata etter at dei hadde ringt på. Då virka dei å vera berusa og støyete, så vi la ikkje så mykje meir i det.

– Men søndag kveld, i 21-tida, kom dei på nytt, og denne gongen kom dei i bil, fortel huseigaren, som ønskjer å vera anonym.

Spant avgarde

Det var fire ungdommar som kom køyrande i ein bil og stoppa i vegen utanfor før dei alle kom opp til døra og ringte intenst på.

– Kona var åleine heime og blei skikkeleg skremt. Ho gjekk for å opna døra og trudde det var noko gale, men då ho kom i døra så høyrde ho berre det slamra i bildører og at bilen spant nedover vegen her.

– Kvifor dei oppfører seg slik veit vi ikkje. Vi har ikkje noko uoppgjort med nokon, så vidt vi veit. 

Har dei på film

Huseigaren sit med gode bilde av dei fire.

– Det dei ikkje veit er at dei blei filma då dei kom. Eg har nemleg kjøpt overvakingskamera til over 30.000 kroner som eg har på eigedomen, så eg har gode bilde av dei som vil bli overlevert politiet om dei ikkje melder seg og ber om orsaking innan 48 timar.

Det er kun på denne adressa dei har vore, ifølgje huseigar. 

Kom og beklaga

Måndag ettermiddag troppa ungdommane igjen opp på den aktuelle adressa. Denne gang ikkje for å plage, men for å forklare seg.

– Vi hadde ein fin prat. Det var fine ungdommar, som ikkje hadde gjort det for å vera ekle, men som berre skulle ha det skøy. Dei hadde ikkje tenkt på at det kunne opplevast som ubehageleg. Det var tilfeldig at dei hadde stoppa hos oss, fortel huseigaren.