Biltjuveri og innbrot
Maxprint har hatt innbrot og ein far som leverte ungen sin i barnehagen i dag fann ikkje bilen sin igjen.


Fredag i 8-tida fekk politiet melding om innbrot i Industrivegen.
– Det var litt rot på kontoret, så eg skjønte at nokon hadde vore her. Så såg eg vindauget som sto på halv åtte, fortel dagleg leiar ved Maxprint AS, Tommy Vaksinen Kristiansen.
Eit lite skrin med kvitteringar og nokre småmyntar er førebels det einaste som er sakna. Ingen av dei andre bedriftene i bygget skal ha spor etter innbrot.
– Ein av dei som jobbar her var på plass før klokka 6, men i ein annan del av bygget. Kanskje han har skremt tjuven utan å veta det.
Stal bil medan far leverte i barnehage
Klokka 07.12 fekk politiet melding om biltjuveri.
– Ein far som hadde levert unge i barnehage fann ikkje bilen igjen då han kom ut på parkeringsplassen, fortel lensmann Rasmus Dalen.
Politiet fann bilen igjen etter kort tid, nokre hundre meter frå barnehagen (ikkje på Essostasjonen i Os sentrum, som vi først fekk beskjed om). I bilen låg ei lommebok som no er sakna.
– Ein person er pågripen og er på bakgrunn av informasjon vi har fått mistenkt for biltjuveriet.
Fleire innbrot
Ei av nabobedriftene til Maxprint kan også fortelja om innbrot i natt, men det var i ein bil som høyrer til bedrifta.
Bilen sto parerkert i Varåsen og har hatt tjuvar på besøk i natt.
– Med alle desse sakene frå same område ser vi ikkje vekk frå at det kan koma nokre fleire no i formiddag, seier Dalen.