Bjarte debuterte

Debut på Stadion, mot Rosenborg, Bjarte Haugsdal seier han ikkje kunne fått ein betre start for Brann. No viser Os interesse for å låna han tilbake.

Kjetil Vasby Bruarøymandag 02. nov. 2009 10:58

(Oppdatert)

I siste serierunde, heime mot Rosenborg 1. november, fekk osingen Bjarte Haugsdal endeleg sin debut i eliteserien.

- Å debutera var stort, å få koma innpå på Stadion mot erkerival Rosenborg gjorde det berre endå større, seier Bjarte Haugsdal til Midtsiden.no.

Sjølv om han berre fekk dryge fem minutt med spel, etter at han kom innpå for Petter Vaagan Moen, seier han at debuten gav mykje inspirasjon til den komande oppkjøringa til 2010-sesongen.

- Eg fekk tre involveringar med ball og kjenna på det å spela for full Stadion. Etter å ha vore i troppen til fem kampar var det fantastisk å endeleg få debutera, seier Haugsdal.

SJÅ INTERVJU MED HAUGSDAL I GARDEROBEN ETTER KAMPEN, PÅ BRANN TV
(Bjarte blir intervjua av ein annan osing, tidlegare lagkamerat på Os, Ørjan Håland)

Kampen enda 1-1 og Brann landa til slutt på 5. plass på tabellen.

God utvikling
Laurdag var Bjarte på Os for å sjå gamleklubben slå Austevoll og rykka opp med både A-lag og Os 2.

- Det var veldig kjekt, gratulerer! seier Bjarte, som med Brann 2 lenge kjempa om å ta Austevoll sin plass som avdelingsvinnar og opprykksmotstandar til Os.

For nokre veker sidan slakta Os-trenar Frank Hellevik Brann si juniorsatsing, og sa blant anna til BA at han meiner Haugsdal hadde hatt betre av å vera i Os enn i Brann.

- Eg kan ikkje heilt forstå kva Os skulle tilbydd meg som ikkje Brann kan. Greit at eg har spelt 3. divisjon for Brann 2, men eg trener med eit eliteserielag. Sidan skaden i vår har formen berre blitt betre og betre, seier Bjarte.

Heiltidsspelar med undervannshobby
Haugsdal var russ i vår og har ikkje starta på ny skule i haust. Han har heller ikkje jobb utanom spelarjobben i Brann.

- Siste året på gymnaset var travelt, så no var det godt med litt skulepause. Det er fotball på heiltid, men eg tar kanskje opp igjen nokre fag over nyttår, seier Bjarte.

- Har du nokre hobbyar utanom fotballen?

- Ja, eg og ein kamerat tok dykkarsertifikat i sommar. Han er også frå Os, men har nyleg flytta til Øygarden. Det blir spennande å ta nokre turar under vatn i skjergarden rundt der han bur no, seier Bjarte.

Måndag ettermiddag skriv bt.no at Os-trenar Frank Hellevik er interessert i å låna den tidlegare Os-spelaren i 2010-sesongen.

- På grunn av vår uavklarte divisjonsstatus, har vi ikke kommet skikkelig i gang med planleggingen av neste sesong før nå. Men vi kommer helt sikkert til å snakke med Brann om Bjarte. Det kommer litt an på hvilke premisser Brann stiller for et eventuelt utleie. Jeg kommer ikke til å godta krav om spilletid, for eksempel. Bjarte må kjempe om en plass på laget, seier Hellevik til bt.no.

I artikkelen kan du også sjå ein snutt med Bjarte på banen i debuten.

Haugsdal er på kontrakt med Brann ut 2011. Laget trener ut november, og skal spela testemonial-kamp mot Viking i slutten av månaden. Då blir det ny sjanse for Haugsdal å få vist seg fram.

Opprykk for eks-kollega
Tidlegare i år hadde Bjarte ein annan osing som lagkamerat, Bjørn Dahl. Dahl gjekk til førstedivisjonsklubben Hønefoss på seinsommaren, men får ikkje langt opphald i divisjonen under Brann.

I helga spelte nemleg Hønefoss avgjerande kamp mot Sogndal, og Bjørn sin klubb rykker opp til eliteserien.