Blir fiksa «fortløpande» - i løpet av året

Os eldreråd er blant dei som har påpeikt problemet med det holete, opphøgde gangfeltet frå Esso til Torggata, over fylkesveg 552 Hatvikvegen i Os sentrum.

Fredag 15. desember sendte Os kommune brev til Statens vegvesen, fredag 22. desember fekk dei svar:

– I «Investeringsprogram for fylkesvegnettet til RTP 2018-2029» er det foreslått å sette av 2,0 mill. kr. til Fv. 552 Hatvikvegen i 2018. Gangfeltet som henvendelsen gjelder er planlagt utbedret i dette prosjektet, skriv Morten Solholm i Statens vegvesen.

Dei siste dagane har engasjementet på Facebook auka, der fleire meiner forholda er krevjande for både fotgjengarar, eldre med rullator, dei med barnevogn - og for bilistane. Dei meiner òg at ventetida har vore lang nok.

– Heng saman med eit anna prosjekt

Midtsiden har i dag snakka med Bente Isdal hos Statens vegvesen. Isdal jobbar med trafikktryggleik og har kjennskap til saka.

– Det stemmer at vi har fått pengar til tiltak, men vi veit førebels ikkje kor tid dette blir gjennomført.

– Årsaka til at det tar litt ekstra tid er at prosjektet heng saman med eit anna prosjekt, gangveg frå Hauge til Hjelle på Hegglandsdalsvegen, opplyser ho.

Vegvesenet har ikkje eigne entreprenørar, men må ut på anbod med prosjekta sine. For å få mest mogleg for pengane er det vanleg at dei hektar små tiltak på større prosjekt.

Har pengar til 1 av 2

Det har kome pengar til tiltak på Hatvikvegen, mens prosjektet langs Hegglandsdalsvegen ikkje er ferdig finansiert.

• Les òg: Staten blir ikkje med på spleiselaget (februar 2018)

– Det blir i desse dagar jobba med finansieringa av prosjektet langs Hegglandsdalsvegen. Eg har ikkje eksakt tidspunkt, men det var snakk om å få dette ut på anbod før sommaren.

– Det går ikkje an å venta på dette!

Statens vegvesen seier gangfeltet over Hatvikvegen uansett skal reparerast i år.

«Det er flere som har falt der, - med og uten kneproteser. Et tilfelle med tenner som ble knust. Dette går ikke an å sette på vent til Vegvesenet har funnet penger» er ein av kommentarane på Facebook-sida «Oppslagstavlo i Os».

– Sånn gangfeltet er no så er det vanskeleg for fleire fotgjengarar, og det slår godt i bilane sjølv ved svært låg fart. Kor dårleg skal gangfeltet bli for at det kjem strakstiltak?

– For at vi skal utbetra dette så må vi ha ein entreprenør til å ta jobben. For å skaffa entreprenør må prosjektet ut på anbod, svarer Isdal.

I brevet frå Solholm frå desember står det samtidig: Henvendelsen om løse brostein i gangfeltet er videresendt til vår driftsavdeling. Reparasjoner og nødvendig vedlikehold for å sikre myke trafikanter i forbindelse med kryssing/overgangsfelt på Fv552 vil bli utført fortløpende og etter behov.

Det ligg med andre ord an til at vi må venta til hausten med å få gangfeltet utbetra. Med mindre situasjonen blir verre, og så dårleg at behovet blir stort nok til at ein entreprenør må tryllast opp av hatten. Til dømes ein som har ansvar for vedlikehald av fylkesveg?

– Vi har utforma teknisk plan for utbetringa, og prosjektet er så omfattande at det er for stort til å bli tatt under drift og vedlikehald.

– Men om fleire steinar lausnar og forholda blir sånn at det må takast, så blir det midlertidig lappa på med asfalt?

– Det må i så fall dei som har drift og vedlikehald av vegen svara på. Dei har òg sine prioriteringar å ta, og ein del hol å tetta etter ein lang og kald vinter.

OPPDATERT: Kort tid etter publisering fortel Morten Solheim at han, seinast i dag, har sendt melding til drift og vedlikehald og bedt dei lappa slaghola som er i gangfeltet i dag.