Blir fiksa sundag
Ein av dei tre strengane i masta på Borgafjellet manglar litt lys. Kvifor?


I år er det ti år sidan det for første gong kom lys i masta på Borgafjellet. Men søre streng har ikkje lys i full lengde.
- Tauet hekta seg i ein bolt og står i ein trekant. Vi fekk det verken heilt opp eller ned igjen, seier Arne Martin Holen.
- Men vi skal opp og prøva å ordna det i morgon.
Med kikkert på terrassen
Arne Martin er mannen som kom med ideen om lys i dei tre bardunane som held Telenor-masta på Borgafjellet (353 moh) i Os. Den tilflytta vossingen sat heime på terrassen sin i Høgehaugen (ved Gudrihaugen) då tanken slo han.
- Eg sat først med kikkerten, og tok seinare turen opp for å sjekka om dette lét seg gjera. Dette var i 1997. Det gjekk eit par år før eg torde å nemna ideen min for nokon, fortel han.
På plass før 2000
Det var mykje snakk om nyttårsfeiringa i 1999 og overgangen til nytt årtusen. Holen, som var engasjert i Bjørnefjorden Reiselivslag, delte tankane sine med Knut Natvik, som den gong var leiar i Os Sentrumsforening.
- Hadde det ikkje vore for Knut hadde det aldri blitt lys. Han likte ideen og ordna alt det praktiske. Han sit også i Os Kulturutvikling, som overtok ansvaret for drifta.
Kvar advent
I utgangspunktet skulle berre Borgafjellet lysa i desember 1999, men investeringa i lyslenkene var gjort og desember året etter var lysa på plass igjen.
- No blir dei tent første sundag i advent kvart år, og vi har lys i lenkene til jula skal ryddast ut av huset i januar.
Hærverk
Os Kulturutvikling har fått mange positive tilbakemeldingar på lyset på Borgafjellet. Men lysa har også vore utsett for hærverk.
- For to år sidan blei lysa skadd. Då vi var oppe for å fiksa dei fann vi skot i den eine lenka. Vi veit framleis ikkje kven som sto bak, seier Arne Martin.
- De har heller ikkje blitt kontakta av mijøaktivistar eller andre som er kritiske?
- Nei, vi har ikkje det.
Ny løysing neste år
Kvar av dei tre lenkene er cirka 50 meter lange, kvar av dei med 50 lyspærer. Før julaftan og før nyttårsaftan er Os Kulturutvikling på Borgafjellet for å skifta pærer som har gått.
- Pærene er berre på 7W kvar, men dei er av den typen som ikkje er i sal lenger, så neste år må vi finna andre lyskjelder.
- Vi kan nok bruka slike slynge som blir brukt andre stadar, dei trur eg brukar minst like lite straum, seier Arne Martin Holen.