Blir langtidsparkering

Fredag 3. august blei tomta etter Circle-K opna som midlertidig parkeringsplass.

Det skal byggast parkeringshus på tomta, og den skal vera riggplass for riving av gamle Os brannstasjon.

– Vi ser at plassen har blitt mykje brukt, og det er positvt. Det ser ut som om denne avlastar sentrumskjerna, at det er fleire ledige plassar til kundar og andre på korttidsbesøk, seier ordførar Marie Lunde Bruarøy.

– Til no har den midlertidige parkeringsplassen vore 3-timarsparkering, men dette vil vi utvida.

Tida blir utvida frå 3 til 9 timar.

– Det betyr at både pendlarar, dei som jobbar i Os sentrum og, naturlegvis, dei som har kortare ærend på Øyro, er velkomne til å bruka plassen gratis.

Dette gjeld fram til det blir byggeaktivitet på tomta.

– Kor lenge vil dette vara?

– Tomta blir parkeringsplass utover hausten, og når brannstasjonen skal rivast er det berre delar av tomta som blir riggplass, resten held fram som midlertidig parkeringsplass, seier Bruarøy.