– Blir mykje god golf

Laurdag og sundag er Bjørnefjorden golfklubb vertsskap for Regiontour Hordaland - eliteturneringa for dei beste golfarane i Hordaland.

– Turneringa er også kvalifisering til Noregscupen kor to plassar til spel i fjerde runde på Miklagard skal kjempast om.

– Til Bjørnefjorden kjem nokre av dei beste spelarane i Noreg, blant anna Renate Hjelle Grimstad frå Bergen golfklubb som vann Noregscupen på Meland førre helg, fortel Eivind Hodneland.

Spelarane spelar 18 hol laurdag og 18 hol sundag, kor dei som ligg best an etter laurdagen spelar saman og startar sist sundag.

– Det gjer at vi held på spenninga og dramatikken heilt til slutt, trur Hodneland som legg til at fleire av Bjørnefjorden-spelarane er å rekna blant favorittane.

Trur på Sverre og Solveig

Hodneland trekk fram Sverre Marcelius og Solveig Helgesen, som gjorde det skarp på Meland sist helg, som to av dei lokale som kan gjera det godt.

Han får støtte frå Sverre sjølv, men instruktøren trekk i tillegg fram ei rekkje andre som han har tru på.

– Eg trur det kjem til å bli ei jamn turnering kor Anders Engelsen, vår eigen junior som spelar Titleist Tour og Aleksander Heggland kan blanda seg i toppen.

– I tillegg trur eg Marcus Brålie, også ein sterk junior og Magnus Utkilen frå Herdla kan blanda seg inn, analyserar Marcelius.

– På kvinnesida er Solveig heilt klart ein av favorittane på heimebane, men ho får nok tøff kamp frå Renate Hjelle Grimstad, Bergen golfklubb og Kristin Simonsen, Meland golfklubb som blei nummer ein og to på Meland.

– Seks av jentene er i noregstoppen, fortel Marcelius som er imponert over det sterke startfeltet.