Brannstasjonen reiser seg

I mai i fjor blei første spadetak tatt, før jul starta betongarbeidet på brannstasjons-tomta på Moberg.

– For 2-3 veker sidan byrja dei også med stålarbeid og om ein månad kjem tømrarane i sving, fortel brannsjef Stein Gjøsund.

– Det er veldig kjekt for oss i brannvesenet å følgja med på arbeidet, det blir ei ny verd for oss å koma i ny stasjon.

Brannstasjonen skal vera ferdig før jul, nærmare bestemt 12. desember i år, 12.12.12.

Fleire milepælar

Gjøsund fortel at han har inntrykk av at det er god dialog mellom byggherre og entreprenør.

– Tor Inge Døsen i Os kommune styrer byggeleiinga med fast hand, seier brannsjefen.

Blant datoane brannsjefen har merkt seg er desse:

14.3: Tømrarane set i gang.
21.3: Taktekkinga startar.
24.4: Tett hus.
6.7: Malarane og golvleggarane byrjar.

Førebur flytting

Noko av det brannvesenet ser fram til er å få utstyr og materiell samla på éin plass.

– Men vi har ikkje byrja å pakka enno, seier Gjøsund.

Likevel har dei byrja å førebu seg på flytting, med planlegging av flytting av delar av utstyret.

– Ein kritisk fase blir flyttinga av sambandet og varslingsanlegget. Her blir eksternt firma kopla inn, for dette må skje raskt, og med backup-løysing.

Medan overrekkinga av ferdig stasjon er 12.12.12 kjem flyttinga og installeringa av nytt utstyr til å skje i etappar.

– I midten av januar 2013 ser eg for meg at det blir offisiell opning, seier brannsjef Stein Gjøsund.