Bronse i Lerøy Cup

Fleire jentelag frå Os kommune har i mars deltatt i Lerøy Cup, Sandviken IL sin jentecup som tidlegare hadde namnet BKK Cup.

To av dei tre laga frå Osbygda som var gamle nok til å spela sluttspel gjekk vidare. Medan jentelaget til Søre Neset måtte nøya seg med siger, uavgjort og tap i innleiande rundar gjekk småjentelaga til Nore Neset og Os vidare som puljevinnarar.

Nore Neset gjekk vidare med 8-1 i målforskjell på dei tre innleiande rundane, Os, som vann serien i fjor med 74-3 i målforskjell, fekk like lite motstand i starten på turneringa og blei puljevinnar med 23-0 i målforskjell.

Fjorårsvinnaren blei slått ut tidleg

Både Nore Neset og Os gjorde det skarpt i denne cupen også i fjor. Då blei det 3. plass til Nore Neset og 2. plass til Os, medan Sotra stakk av med sigeren.

I år blei Sotra slått ut tidleg medan Vadmyra, som har slått kretsmeister Arna Bjørnar to gongar i vinter, blei den hardaste motstandaren for begge laga frå Os.

Nore Neset vann sin 1/8-finale 3-1 over Åsane, men tapte 0-6 for Vadmyra i 1/4-finalen.

Os slo Varegg 2-1 i 1/8-finalen og Odda, som spelte KM-finale i Rogaland i fjor, 2-0 i 1/4-finalen.

Tapte semifinalen

Mot Vadmyra blei det som venta tøffare, men Os sto godt imot og var nær på å utlikna 1-0-leiinga som motstandarane skaffa seg i første speleminutt.

I staden blei det 2-0 til pause og 3-0 som sluttresultat til Vadmyra sin fordel.

Vadmyra vann finalen 6-1 over Hetlevik. Os seier seg nøgde med 3. plassen, men skulle ønskt å møta Vadmyra først i finalen.

Til semifinale i vinterserien

Allereie måndag kveld møter Os Vadmyra igjen, då i siste runde i mellomspelet i vinterserien. Begge lag er uansett vidare til semifinale, og står etter to kampar i mellomspelete med 15-1 (Vadmyra) og 14-0 (Os) i målforskjell.

I semifinalane til Os og Vadmyra ventar Sotra og Gneist.

Underteikna er, saman med Kjetil Lyssand Lindbom, trenar for Os SMJ14.